Nongstoiñ, Jymmang 28: Ka kur Ïawlar na ka shnong Diengsyiang ha ka sngi Palei, ka la leit ban pyn sangeh bad khang shuwa shipor ïa ki nongtih shyiap bad ki khlong bad kit shyiap na ka Wah Kynshi kaba don ha Nongkhnum.
Ka kur Iawlar hapoh ka jingïalam u bah Micheal Ïawlar Secretary ka Kur Ïawlar hynriew kpoh kala ong ba kine ki jaka khlong syiap ki dei kiba dang hap hapoh ka shnong Diengsyiang.
Ka ong ba ka daw ka dei namar ka jingkit shyiap ki kali kala pynsniew lut iaka surok ha shilynter naduh ka shnong Nongjyllieh ter ter shaduh ka madan Niamlang, ka jaka ba ju pyniaid ia ki kali ki nongwan jngohkai pyrthei.
Ka ong ba ka jingsniew jong ka surok kala ktah jur ia ka kam jngohkai ha ka thain.
Ia kane ka rai la shim hadien ka jingialang paidbah ka Kur kaba la pynlong ha Diengsyiang. Ka Kur kala khang ruh ia ka khyrdop lum pisa ia ki nongleit jngohkai sha ka Nongkhnum.
Ka Kur kala leit ruh ban ai da ka jingthoh sha ki nongshimwai ia ki jaka pynieng kali bad sha ki nongtih shyiap na katei ka thain. Kala leit ai ruh da ka jingthoh sha ka Deputy Commissioner ka West Khasi Hills, Hema Nayak halor kane ka rai.
