Shillong, Naiwieng 18: Ka UDP State Youth Wing kala mih ban ai jingkyrshan pura ia ki nonghikai Deficit da kaba kynthoh kylla ia Symbud Myntri Rangbah ka Jylla u Bah Prestone Tynsong ia kaba la kynnoh ba ula khot ia ki kum ki kruiñ bad ki sohpyut.
Ha ka kyrwoh ha ka sngi Balang, ka Youth Wing kala ong, ba katei ka jingkren kaba la kren da u Bah Tynsong ha Pongtung, Pynursla ha ka 21 tarik u Naiwieng kala pynmong ym tang ia ki nonghikai hynrei ia ka jaidbynriew Hynniewtrep hi baroh kawei.
“Ki nonghikai kim dei ki kruiñ. Ki nonghikai kidei ki nongtei ia ka imlang sahlang. Man la ki Myntri Sorkar, ki MLA, Doctor, Engineer bad ki Officer mynta kidei kiba la mih na ka jinglen lade jong ki nonghikai” la ong ha ka kyrwoh.
“Ban khot ia ki kruiñ kadei ka jingniewbeiñ ia ka jaidbynriew Hynniewtrep baroh kawei bad ia ka lawei jong ka Meghalaya,” kila bynrap.

Katkum ka jingpynpaw jong ka Youth Wing, u Symbud Myntri Rangbah ula ioh ia ka lad ban sngap ia ka jingsngewkhia jong ki Khasi Jaintia Deficit School Teachers’ Association (KJDSTA) da kaba sngewrit, hynrei ula pynphai kylla da kaba kren da ki ktien kiba tohmet. Kala ong ba ka jingpynshai ka jongu ba ka jingkren kadei thik tang ia ki katto katne ngut ki nonghikai ka long kaba lyngkot bad kaba lah slem palat bad ka bym iahap kat u nongialam uba bat ia ka kyrdan kaba ar ha ka ophis jong ka jylla.
Ka Youth Wing kala dawa ba u Bah Tynsong u dei ban pan map paitbah khlem kano kano ka jingbuh kyndon sha ki nonghikai. Kala dawa ruh na ka sorkar ba kadei ban khot iakren noh mardor ia ki nonghikai bad ruh ban wanrah ia ki lad ban weng ia ki jingeh ha ka por kaba biang ia katei ka jingdawa kaba la slem bah bad ka pynkynmaw ia ki myntri ban kren na ka bynta ki nonghikai bad ki samla da kaba burom.
“Ngi ieng ban ai jingkyrshan pura ia ki nonghikai Deficit. Ngi maham ia ka sorkar ba kam dei ban tynjuh than ia ka jinglong jaijai jong ki samla bad ki nonghikai ka Meghalaya” la maham ha ka kyrwoh khubor.

