Ka jingthung DGP ba pura kan iaid kat kum ki kyndon ka SC, UPSC bad MHA : DyCM
Shillong, Naiwieng 18 : Ka Jylla Meghalaya kan ioh da u Acting DGP naduh ka janmiet sngi Palei, ha kaba ka Sorkar Jylla kala rai ban aiti ha u Additional Director General of Police bala trei slem duh hadien ka jingshongthait noh ka DGP ba mynta Kong Idashisha Nongrang.
Ia kane la pyntip da u Symbud Myntri Rangbah ba khmih ia ki kam Pohiing (Police) Bah Prestone Tynsong ha ka sngi Balang, haba kren shai ba kane ka jingpynbeit ba shipor kan iai bteng tad haduh ban da dep ka jingjied ia u DGP ba pura.
“Lashai janmiet ka DGP jong ngi kong Idashisah Nongrang kan shongthait noh. Ka Sorkar kan aiti ha u ADGP bala trei slem bha ba un khmih ia ki kam tad haduh ka por ba ngi la lah ban pyndep ia baroh ki jingdonkam” ong u Bah Prestone.

U DyCM ula kren shai ba ka Sorkar kam lah satia ban iaid lait ia ki kyndon bala buh ha kaban thung ia u DGP ba thymmai, kaba hap ban iaid kat kum ka hukum ka Supreme Court bad ki kyndon na ka Union Public Service Commission bad ka Ministry of Home Affairs, nalor ki ain ka Jylla.
“Ban jied ia u DGP ba thymmai, ki don shibun ki kyndon ba ki rule kiba hap ban bud kynthup ka hukum ka Iingkashari Supreme Court, ki kyndon ka UPSC bad ka MHA bad ki ain ka Jylla” ula ong.
Halor ka jingbuhpor ban pyndep ia ka jingthungkam ba pura, u Bah Prestone ula kyntait ban ai kano kano ka jingkular haba kdew ia bun ki jingdonkam kiba hap ban pyndep.

