Shillong, November 18: Ka Shillong kala pynkhreh ban pynlong ia ka tamasa ka tem ka put kaba heh, ha kaba u nongrwai Hip-Hop na America u Nelly ula wan poi ha nongbah hashwa ba un leit ban pynshongshit ha ka Shillong Cherry Blossom Festival ha ka 20 tarik u Naiwieng.
Une uba la ioh bun tylli ki khusnam Grammy, Diamond-certified rapper, yn pynbyrngia ha Madan Kurkalang, Bhoirymbong, kaban long ruh ka jingwanrah ia ki nongrwai kiba pawnam ha ka pyrthei sha ka Jylla Meghalaya ha ka almanak jong ki Concert ha ka pyrthei.
U Nelly, uba long uwei na ki kyrteng uba pawnam ha ka Hip-Hop ha ka pyrthei, ula pawnam lyngba ka jingrwai ia ki jingrwai kiba kynthup ia ka ‘Ride wit Me’ bad ‘Dilemma’. Ka jingwan ban pynbyrngia ka jongu ha Shillong kadei kaba la khmih lytni ba kan khring ia ki nongieid jingrwai na kylleng ka thaiñ shatei lammihngi bad wat na shabar ruh.

Nalor ka tem ka put, ka Sorkar Jylla ka dang peit bniah ban don ia ki Concert kiba heh kum ka bynta kaba kongsan ban kyntiew ia ka kam jngohkai, lad aikam aijam bad ki kam kiba iadei bad ka khaii pateng.
Hapoh jong ka jingialam jong u Myntri Rangbah u Conrad K. Sangma, ka Jylla kala buh ia ki tamasa ka put ka tem ha ka kyrdan kum shi bynta jong ka buit treikam ban pynkhlain ia ka kam jngohkai, ka ioh ka kot lyngba ka jingdon ia ki sap ki phong, bad ki Concert kiba heh kiba lah ban pynmih ia ki khaii pateng na ka bynta ki Hotel, Restaurant, ki nongpyniaid ia ki kali bad ki nongdie jingdie.
Ka jingkylla ha ka ioh ka kot kadei kaba la sakhi ha ka Concert ha u snem 2025, ha kaba ki Concert naduh jong u Bryan Adams, ki jingpynbyrngia lyngba ka Cherry Blossom Festival kila khring ia kumba 3.86 lak ngut ki nongwan ha ki 13 sngi. Na kitei kumba 76,000 ngut kidei ki nongjngohkai, kaba long 4.7% na ka jingwan tuid ki nongjngohkai kaba man la ka snem sha Meghalaya.
Kine ki tamasa kila lah ban kyntiew haduh 5 ne 6 shah ia ka jingioh ha ka ioh ka kot ha ki liang ki bapher bapher, katba tang ha ka liang jong ka jingpynbiang ia ki jaka sah ka jingiohnong ki Hotel kala long palat ia ka T.33 Klur, kaba long kumba 27% ha ka “Overall Economic Stimulus”.
Ki por long ki Concert kila pynmih ruh kumba 5,500 tam ki kam man la ka sngi ha kylleng ki bynta bad khamtam ka jingpyndonbynta ha ki kam Online ryngkat bad kumba 60,000 tylli ki jingpynpaw ha ki rynsan social media bad 22 million ka jingpeit lyngba ki Reel.

