Aizawl, Jymmang 20: U Myntri Rangbah ka Mizoram Zoramthanga hynne ka sngi Thohdieng ula ong ba ka Sorkar Jylla kam lah satia ban tuklar eiei ia ki kam pohiing jong ka jylla Manipur.
Haba iakren bad ki nongthoh khubor ha Mizoram, u Zoramthanga ula ong ba ka sienjam ka dei ban wan na ki para ha Manipur namar ka kam ban pyniatylli ia ki jaidbynriew Kuki-Chin-Mizo kam dei kaba shu pynjari.
Ula ong ba ka sorkar Jylla kam lah ban mushlia ia ki kam ba hapoh iing jong kawei pat ka Jylla ba marjan.
Hadien ka jingmih ka jingiakynad jaidbynriew ha Manipur naduh ka 3 tarik Jymmang, u Myntri Rangbah ka Mizoram Zoramthanga ula iakren bad u Myntri Kam Pohiing ka Ri Amit Shah bad ia u Myntri Rangbah ka Manipur N biren Singh.
“Ngi lah pyrshang kat ba lah ban wanrah ia ka jingshongsuk shong shngain ha Maniput bad ruh ban khmih ia ka bha ka miat ki briew ba kylla phetwir kiba la leit wad jaka riehtngen sha kiwei ki Jylla kynthup ka Mizoram ong u Zoramthanga.
Palat 6600 ngut ki briew na Manipur kila shong ha ki jaka sah ba shipor hapoh ki hynriew tylli ki District ka Mizoram.
Baroh ki kynhun ba kynthup ia ki 10 ngut ki MLA, Indigenous Tribal Leaders’ Forum (ITLF), Kuki Inpi Manipur (KIM) Zomi Council, Hmar Inpui (HI) bad kiwei ki sengbhalang na Maniput ha ka sngi Balang kkla rai ban nym iashimbynta ha ki jingiakren bad ka sorkar Manipur ba mynta.
