Shillong Naitung 06: Ka Sorkar Jylla kan sa khot Tender biang ia ka Municipal Complex ha Polo ha ka taiew ban wan, kaba long palat shi snem hadien ba lah dep plie da ka Myntri Pla Tyngka ka Ri ka Nirmala Sitharaman ha u Naitung jong u snem ba la dep, namar ka jingbym don ba wan shakhmat ban shimti pyniaid ia ka complex wat hadien laisien bala khot ia ka tender.
Haba pyntip ia kane ha ka sngi Nyngkong, u Symbud Myntri Rangbah ka Tnad Urban Affairs Bah Sniawbhalang Dhar ula ong, ba ka dor kaba la buh hashwa lehse ka lah ban dei ba kala heh palat bad ka Tnad mynta kan sa khmih bniah biang khnang ba yn ioh pyntreikam noh mardor ia katei ka jingte.
“Ngim pat lah ban pynthikna namar ba ngi lah khot thep tender la 3 sien bad ym shim la don ki ba thep. Kumta ka paw kumba ka dor ka lah long kaba heh than” ong u Bah Dhar haba iakren bad ki nongthoh khubor.
“Myn ha ka Sngi Thohdieng jong ka taiew kaba la dep nga lah lum ia ka jingialang bad ki ophisar. Kumta ngi lah ban khot tender thymmai bad ngin sa pynduna noh khyndiat ia ka dor. Ngi kwah ba ia katei ka jingtei kan sdang treikam noh mardor hi” ula ong.
U Symbud Myntri Rangbah ula ong, ba ka sorkar ka thmu ban shu ai wai noh sha ki kynhun kiba heh bad barit ban pynthikna ba kin lah ban pyndonkam pura ia katei ka jaka.
Ha kaba iadei bad ka jingshna pynbha ia ka Khyndailad, u Bah Dhar ula ong ba ki kam kidei kiba don ha ka bynta kaba khatduh bad yn sa khot noh shen ia ka Expression of Interest (EOI) shisien ba la dep ban shna pyndep ia ki bynta kiba hashuwa.
Ula bynrap ba ka Leasing Policy na ka bynta ka Khyndailad kan dei kaba buh hakhmat shwa ia ki nongdie jingdie trai jylla.
“Ngin sa buh da ka dor kaba rit na ka bynta ki paitbah ka jylla bad ha ka dor kaba heh na ka bynta ki kompani. Ngin pyrkhat shwa na ka bynta ki paitbah ka jylla” ong u Bah Dhar.
