Shillong, Naitung 06 : Ia ka kam ban trei pynheh ia ka Shillong Airport lah dep ban aiti sha u contractor hynrei ka kam ban pyntrei ia ka project kan dang ban sdang, ong u Symbud Myntri Rangbah ba khmih ia ka Tnad Transport Bah Sniawbhalang Dhar ha ka sngi Nyngkong.
U Bah Sniawbha ula iathuh ba ka Jylla kala dep ban ioh ia baroh ki jingbit kiba donkam na ka Sorkar Pdeng ban lah pyniaid shakhmat ia ka project.
“Ia ka kam lah dep ban aiti bad u contractor un dang ban sdang pyntrei ia ki kam. Kane ka dei ka jingtip kaba khatduh ba ngi ioh haduh mynta” ong u Bah Sniawbha haba iakren bad ki nongthoh khubor.
“Ia ka jingbit ban pyntrei noh ia ka kam la dep ban ioh na ka Sorkar India.. Ta ka daw ngi la lah ban pynlait ia ka tender” ula ong.
Halor ka jingsiew ia ka bai jaka bala thied ban pynheh ia ka Kad, u DyCM ula ong ba kiba bun ki jingsiew lah dep ban leh hynrei ka lah ban mih ka jingdonkam shuh shuh ia ki jaka.
