Shillong, Naitung 06 : Ka Khasi Jaintia Christian leaders Forum (KJCLF) ha ka sngi Nyngkong, kala pynpaw ia ka jingsngewnguh ia u Myntri Rangbah Conrad K Sangma bad ki Nongialam Balang na Jylla namar ka jingpynsngew ia ki jingsngewkhia halor ka FCRA Amendment Bill, 2026 bad ka FCRA Amendment Rules, 2026 bad u Myntri kam Pohiing ka Ri Amit Shah ha New Delhi.
Ha ka kyrwoh, u Secretary ka KJCLF Rev Edwin H Kharkongor ula ong ba ka jingialang ka dei ka kam ba iohijngai, ban pynpaw ba kumno kine ki jingtyrwa pynkylla ki lah ban ktah ia ki jaka ai jingshakri ia ka imlang sahlang ha Meghalaya.
“Ngi pdiang sngewbha da ka jingsngewnguh kaba khraw ia ka jingiohi jngai jong u Myntri Rangbah Conrad K Sangma bad ki Nongialam Balang na Meghalaya ban iakynduh ia u Myntri kam Pohiing Amit Shah ha ka ban pyniohsngew ha u ia ki jingsngewkhia halor ka FCRA Amendment Bill, 2026 bad ban ieng pyrshah ia ka FCRA Amendment Rules 2026” ong u Rev Kharkongor.
Ka Forum ka pynpaw ba ki jaka pule bad ki jaka sumar bala pyniaid da ki seng niam bad ki seng trei mon sngewbha ki shim ia ka bynta kaba kongsan bha ha ki jaka kiba ka jingshakri jong ka Sorkar kim poi satia.
“Ka Jylla ka khuslai ba ki jingkylla bala tyrwa kin pynkdiah noh ia ki kam ba kongsan ka imlang sahlang kum ki jaka pule bad ki jaka ai jingsumar ha kylleng ka Meghalaya ki ban shah ktah jur bha. Kine ki jaka treikam ki ai ia ka jingshakri kaba kongsan sha ki jaka kiba ka jingshakri ka Sorkar kim poi satia” bynrap ka kyrwoh.
Hadien ka jingialang bad u Myntri kam Pohiing ka Ri, ka KJCLF kala kyntu ia ka Sorkar Jylla ba kan iakren ia kane ka kam hapoh ka Iingdorbar Thaw Ain ka Jylla.
“Kum ka jingpynbud ia kane ka jingialang, ka KJCLF ka kyrpad ia u CM Conrad K Sangma bad ki Nongthaw Ain ka Jylla ba kin shim rai da ka resolution hapoh ka Iingdorbar Thaw Ain ka Jylla, ba kyrpad ia ka Sorkar India ba kan weng noh ia ka FCRA Amdnement Bill 2026 bad ka FCRA Amendment Rules 2026-kumba leh ka Iingdorbar Thaw Ain ka Kerela ha ka 1 tarik Naitung 2026” ong u Rev Kharkongor.
Ka Forum kala kyntu ruh ia u Myntri Rangbah bad ki Nongialam Balang ba kin rah ia kane ka kam sha kiwei pat ki Jylla ka thain Shatei Lam Mihngi.
 ha ka sngi Nyngkong, kala pynpaw ia ka jingsngewnguh ia u Myntri Rangbah Conrad K Sangma bad ki Nongialam Balang na Jylla namar ka jingpynsngew ia ki jingsngewkhia halor ka FCRA Amendment Bill, 2026 bad ka FCRA Amendment Rules, 2026 bad u Myntri kam Pohiing ka Ri Amit Shah ha New Delhi.){kind=link}