Shillong, Naiwieng 21:Ka Jylla Meghalaya ka la pynkhreh ban pynlong ïa ka 39th National Games ha u snem 2027, ha kaba ka jingpynneh pynsah ïa ka mariang kan long kawei na ki mat ba kongsan tam ha ka jingpynkhreh bad ka rukom pynlong ïa kane ka lympung ïalehkai, la pyntip ki ophisar ha ka jingïalang kaba nyngkong jong ki Functional Areas, kaba la long ha ka sngi Thohdieng.
Ia kane ka jingialang la pynlong ha Secretariat, ia kaba la pyniaid da u Vijay Kumar D u Commissioner and Secretary ka tnad Sports and Youth Affairs bad Chief Executive Officer jongka National Games Secretariat Society (NGS).
Kane ka jingialang kala khmih bniah ia ki kam jong ki 20 tylli ki ‘Functional Areas’ kiban khmih ia ka jingpynlong ia ki jingialehkai.
Ha kane ka sngi la iadonlang ka Kong Isawanda Laloo ka Secretary jongka Sports and Youth Affairs bad u Additional Chief Executive Officer ka NGS u Bah Alertson Nongbri bad Director ka Directorate of Sports and Youth Affairs, u Bah Paia B War Nongbri u Deputy Director jongka Directorate of Sports and Youth Affairs, u Bah John F Kharshiing uba long u Working President ka Meghalaya State Olympic Association (MSOA) bad Joint Chief Executive Officer, NGS bad ka Kong Matsiewdor War Nongbri ka Vice President jongka MSOA, ryngkat bad kiwei pat ki heh ophisar ka Sorkar Jylla.
Ki Deputy Commissioner jong ka Shillong, Tura bad Jowai kila iashimbynta lang ha ka jingialang da kaba leh Online. Ki dkhot jongka ‘20 Functional Areas’ bad Sub-City Committees ia ka Jowai bad Tura, kiba la shim na ki tnad bapher jong ka Sorkar ruh kila iashimbynta lang.
Da ka jingiashimbynta lang jong ki bor pyniaid district bad ki dkhot ka Committee na ki tnad bapher bapher, ka jingialang kala banjur ba ka 39th National Games kam dei satia ka lympung iakob ialehkai tang jong ka tnad Sports and Youth Affairs.
“Kane ka lympung iakob ialehkai kan dei ka jingiatreilang jong baroh ki tnad jong ka Sorkar Jylla bad lah mynjur ba ka Jylla baroh kawei kin iatreilang ban pynlong ia kane ka lympung iakob kaba seisoh” la ong ki ophisar hadien ba la wai ka jingialang.
La phaikhmat kyrpang ruh ban pynlong ia ka 39th National Games kum ka Green Games, ha ryngkat ka jingpynneh pynsah kum ka jaka pdeng ha ka rukom pynwandur bad jingpyniaid.

