Itanagar, Naiwieng 21: U Myntri ka tnat kam poh iing ka ri Amit Shah, ula don ha ka jingleit jngoh kaba ar sngi sha Arunachal Pradesh, hapdeng ka jingpyrshah kaba jur ia ka jingthmu ban shna ia ka Siang Upper Multipurpose Project (SUMP) kaba 11,200 MW, kaba la pynmih ia ki jingiakhih ha kylleng ki bynta jong ka Jylla.
Ka jingleit jngoh jong u Shah ka shim ïa ka jingmut kaba kongsan pyrshah ïa ki jingïakhih ban tei ia ka dam ha u bnai ba la dep, ha kaba ki seng trai ri bad ki nongshong shnong ki la pynjur ïa ka jingpyrshah jong ki ïa kane ka project bording.
Katto katne ki seng kiba pyrshah ia katei ka projek ki la aiti ia ki jingthoh sha ka sorkar, da kaba kyntu ban pyrkhat biang ia katei ka jingtyrwa.
Ka Adi Baane Kebang United (ABKU), ka sengbhalang ba heh duh jong ka jaitbynriew Adi ka la ai ia ka jingthoh jingkynmaw sha u Amit Shah, ha kaba ka la pynpaw biang ia ka jingpyrshah iaka projek.
Ka seng ka la kynnoh ba ïa kane ka jingtyrwa, ka sdang nyngkong eh haduh 45 snem mynshwa, la bishar bniah da ki sorkar jylla kiba bud ryntih bad la kyntait arsien shwa ban pynim biang da ka sorkar kaba mynta ha u snem 2024.
Ha ka jingthoh jingkynmaw jong ka, ka ABKU ka la pynpaw ïa ka jingsngewkhia halor ka jingheh jong ka projek 11,200 MW bad ka la kynnoh ba ki jaidbynriew trai ri ki shah ialam bakla ne ki lah ban mad ïa ka jingshah pynkynriah jubor nala ki jaka jong ki.
Kane ka projek kan iaid kylleng ki distrik Siang, East Siang bad Upper Siang, ka la mih kum ka mat kaba kongsan ha ka sain pyrthei bad paidbah, ryngkat ka jingsngewkhia halor ka jingshah pynkynriah jaka, ka jingktah ia ka mariang bad ka lawei jong ki jaidbynriew trai ri trai muluk.
Halor kane ka jinglong jingman, la khmih lynti ruh ba u Shah un pynlong ïa ki jingïakren bad ki seng kiba ïalam ïa ka jingïakhih pyrshah iaka project bording.
Ha kane ka sngi saitjaiñ, u Myntri ka tnat kam pohïing u la ïashim bynta ha ka President’s Police Colour presentation haka Parade Ground of the Police Training Centre in Banderdewa.
Ha ka por 2.30 baje janmiet, u Shah un pyniaid ia ka jingialang bishar bniah ha Lok Bhavan ha Itanagar, ha kaba la khmih lynti ba yn iakren ia ki kam pynroi, ka jingpahara khappud bad kiwei kiwei ki mat kiba iadei bad kane ka jylla.
Ha ka 22 tarik Naiwieng un plie ia ka Arunachal Pradesh Cooperation Vision Document 2047 ha Dorjee Khandu State Convention Centre. Un sam ruh ia ki shithi thung kam sha ki nongtrei sorkar kiba dang shu thung thymmai, un sam ruh ia ki khusnam Cooperation Awards bad plie ia ka Saras Mela.
Kham hadien u Shah un plie ia ka Campus ba thymmai jong ka 12th Battalion of the National Disaster Response Force (NDRF) ha Hollongi, hajan Itanagar shwa ban leit phai sha New Delhi.
Ka jingïakren jong u Myntri ka tnat kam pohïing bad ki nongïalam ka jylla bad ki kynhun ba ïakhih ka don hapdeng ka peit bniah namar ka jingpyrshah ïa ka projek Siang.

