Shillong, Naiwieng 21 : Ki bor district ka East Khasi Hills, kila khang pyrshah ia ka jingwan rung ki trok kit skum ba kit palat pud bad ba khlem tap, ba kin wan rung sha Shillong haba pynpaw ba kane ka buh ha ka jingma ia ka jingkem ding bad jingpynjaboh ia ki surok.
Ha ka hukum bala pynmih ha ka 20 tarik Naiwieng, hapoh ka kyndon 163 jong ka Bharatiya Nagarik Suraksha Sanhita (BNSS), u District Magistrate R Wahlang ulaong ba ki trok bad ki pickup kiba kit skum palat pud bad ba khlem tap, kila iaid ha kylleng jong ka sor.
Ka hukum ka maham ba u skum u lah ban tyngkhuh bad ki sainar elektrik, kaba lah ban lam sha ka jingkem ding bad jingpluh kaba shyrkhei.
Ka ong ruh ba u skum uba hap na ki kali ula pynjaboh ia ki surok ha ki kyntoit bapher bapher bad pyni jaboh khait ia ki jaka.
Haba khmih ia ka jingdon ban leh eiei kyrkieh, ia kane ka hukum ba khang pyrshah la pynmih mardor bad kala sdang treikam noh mardor tad haduh ban da pynmih da kawei pat ka hukum.
La bthah ia u District Transport Officer ka East Khasi Hills ba un pynthikna ia ka jingpyntreikam ia ka hukum.
Kino kino kiba pynkhein kin shah pynshitom hapoh ka kyndon 223 jong ka Bharatiya Nyaya Sanhita (BNS).

