Tura, May 20: Uwei u briew uba donkti ha kaban leh beijot ia kawei ka khynnah na West Garo Hills ula shah pynsajia ha ka Special POCSO Court da kaba shah set 14 snem ha phatok ryngkat bad ka dain kuna T.10000.
Ha ka jingtian bishar ia katei ka jingjia kaba la jia 5 snem mynshwa, khatduh khatwai mynta ka taiew, ka POCSO Court kala rai ia katei ka jingpynsajia ia u Saddam Hussain uba na Pushkunipara, Bholarbhita kaba don ha ka thain Phulbari jongka West Garo Hills uba la leh be-ijot ia kawei ka khynnah rit katba ka dang leit ialehkai ha kawei ka madan bad la ki paralok ha ka 23 tarik u Jymmang 2018.
Hadien ka jingtohkit kaba bniah da ka sub inspector ka Sildha N Marak la lah ban pynngat ia ki kam bymman ha ka 31 tarik u Nailar 2018.
Haba ka jingtian bishar kala poi noh sha kaba kut, ka iingbishar jongka special judge POCSO kala shem ba u Saddam ula lehbia katei ka kam runar bad kala pynsajia ia u. Hadien kane ka jingrai pynrem ka iingbishar kala rai ruh ban set ia une u bymman haduh 14 snem bad ka jingdain kuna T.10,000.
Lada jia ba une uba la shah rai pynrem ym siewnia katei ka kuna yn shah set hapoh phatok sa 3 bnai la pynbna ka POCSO Court, Tura.
