Tura, Iaiong 20 : Ka All Meghalaya 4th Teachers’ Association, Garo Hills unit, kila pynkup burom ia u Myntri Rangbah ka Jylla Conrad K Sangma ha ka sngi Nyngkong, haba ai jingithuh ia ka jingwanrah ka Sorkar ia ka tulop bala pynbeit ryntih.
Kane ka jingialang bala pynlong ha District Auditorium ha West Garo Hills, ka pyni ia ka jingktah jong kane ka jingsiew tulopba thymmai kaba thmu ban pynthikna ia ka jingsiew tulop kaba shai bad ha ka por kaba biang haba weng noh ruh ia ki jingeh ba iadei bad ka jingsiew tulop bad ka jingshakri ki nonghikai.
Haba ai jingkren ha ka jingialang, u Conrad ula shim ia kane ka jingpynkup burom kum ka jingialang kaba “kham niar eh ban jia” haba pynpaw ba ki nongmihkhmat paidbah kim ju kham ioh ia ka jingithuh na ka bynta ki kam ba ki trei. Ula ai ka burom ia ka jingioh iakren jong u bad ki Nonghikai ha ka por ba u dang long kum u MP ban pynwandur ia ka jingsngewthuh ia ka jingeh hapoh ka kam pule puthi.
U Myntri Rangbah ula ong ba palat 23000 ngut ki nonghikai ha kylleng ka Jylla Meghalaya kin ioh ia kane ka jingmyntoi na ka rai ba dang shen jong ka Sorkar, kynthup kiba kiba hikai ha ki skul SSA, Adhoc, Hindi Grant, Science Grant bad Fourth Teacher. Ula banjur ba ka long kaba eh hynrei ka rai kaba donkam la shim ban wanrah ia ka jingkylla kaba la pynbeit ryntih bad ai ia ka jingsiew ka ban pynmyntoi ia ki nonghikai.
U Conrad ula pynpaw ruh ba ha ka por ba ka Sorkar jong u ka shimti ia ka Ophis ha u 2018, ka kam pule puthi kam don satia ia ka lynti iaid kaba shai. Ula kdew ia ka jingthaw ia ka Education Policy bad ka jingpynkha ia ka Education Commission kum ka sienjam ba donkam ha kaban weng ia ki jingduna ha ki jingtei, ka bha ka miat ki nonghikai, ki jingai jinghikai bad ka jingpynrung lang ia ki technology.
Kiwei pat kiba la ai jingkren ki kynthup ia u Myntri ka tnad Pule Puthi Bah Lahkmen Rymbui bad kiwei kiwei.
