Shillong, Iaiong 20: U Myntri ka tnat ka koit ka khiah Bah Wailadmiki Shylla ha ka sngi Nyngkong, u la pyntip ba haduh mynta ym pat don satia kiba ioh ia ka jingpang niangpyrsit ha Meghalaya watla kane ka jingpang ka don ha Bangladesh ha kaba palat 100 ngut ki khynnah kila khlad.
“Kumba phi tip baroh, ba ka don ka jingpang niangpyrsit haka ri ba marjan ka Bangladesh ha kaba palat 100 ngut ki khynnah ki la ïap” la ong u Bah Wailad.
U Bah Wailad u la ong ba ka Jylla ka dang buddien bad peitngor bha ia ki district kiba don ha khappud jong ka ri Bangladesh.
“Kumba ka long mynta ngi dang peitngor bad buddien bha khamtam bad baroh ki district ba marjan kiba bad ka ri Bangladesh. Kumba ka long mynta ngim pat ïoh kaiphod ba kdew ba don jingpang niangpyrsit” u la pynpaw.
U Myntri u la bynrap ba ula ai ia ki jingbthah sha ki nongtrei bad officer ka tnat ka koit ka khiah.
“Ngi la bthah ia baroh ba kin husiar bad pyntip lada don kano kano ka jingjia, kumba ka long mynta ym pat don kano kano ka jingjia haduh mynta ka sngi” ula ong.
