Guwahati, Iaiong 20: Ka jingbishar kaba la ap slem bha kaba la wanrah ïa ka jingpynkut noh ïa kawei na ki mukotduma ba shah bom shnog ha Assam, ka Nagaon Sessions Court ha ka sngi Nyngkong ka la rai pynrem ïa ki 20 ngut ki nongshah kynnoh ha ka mukotduma pyniap ia u Abhijit Nath–Nilotpal Das ha u snem 2018, katba ka la pyllait ïa ki 25 ngut kiwei pat.
Kane ka rai ka wan hadien ba la jan 8 snem ka trial bad ka hearing ha kane ka mukotduma kaba la pynmih ïa ka jingbitar kaba jur ha kylleng ka jylla bad shabar jong ka jylla.
Kiba la shah rai pynrem ki kynthup ïa u Biswaram Swargiary, u Pantheng Basumatary, u Alafaj Timung, u Incent Engti, u Raikong Timung, u Ratneshwar Terang, u Phukan Lekti, u Enz Timung, u Pres Timung, u Rupsing Kro, u Dhanu Mesh, u Babusing Kro, u Bikram Hanse, u Sikari Bidyaping Rongpi, u Babu Rongpiyop u Basumatary, u Waris Rongpi, bad u Onda Mesh, nalor kiwei pat.
Hynrei ka iingbishar ka la pyllait ia ki 25 ngut ki briew shimet, da kaba kynnoh ba ym don ki sakhi kiba biang pyrshah ia ki.
Katei ka case, ka sdang naduh ka 8 tarik Jylliew, 2018, ha kaba u Abhijit Nath bad u Nilotpal Das, baroh arngut kiba dei na Guwahati, ki la shah shoh ha ki paidbhur haduh ban da iap ha ka shnong Panjuri kaba hap hapoh jong ka Dokmoka police station ha Karbi Anglong district.La iathuh ba kitei ki nongthombor, ki la bakla ia kitei ki arngut ki samla, ba ki dei ki nongrah bor khynnah, hadien ki khubor kiba la saphriang stet ha katei ka thain.
Kane ka jingjia ka la paw pyrthei kum ka jingma ba shyrkhei kaba la mih na ka jingbakla ha ka jingioh jingtip bad ka jingpeitngor jong ki paidbah, kaba la pynmih ïa ka jingïakren kaba jur bha halor ka jingpynjari aiñ, ka jingpynsngewthuh paidbah, bad ka bynta jong ki social media kaba pynmih ïa ka jingklumar jingmut.
Ka iingbishar ka la buh ban pynbna ia ka jingpynshitom ha ka 24 tarik u Iaiong.
