Shillong, Iaiong 20 : Kum ka sienjam ban tem ia ka jingpur ka jingpang mih ‘Niangpyrsit’ kaba lynshop mynta ha ri Bangladesh, ki bor pyniaid district ka East Khasi Hills kila pynmih ia ka jingbthah ba kyntu ia ki paidbah ba kin long kiba phikir bha, ban peit pyrman bad ban pyntip mar mar lada sub aba don kiba mih ‘Ningpyrsit’.
Ki bor District kila bthah ia baroh ki Tnad-khamtam ki skul bad ki Aganwandi Centre ba pyniaid da ka ICDS-ba kin long kiba husiar bad shimkhia mar dor ban khanglad ia ka jingpur. Ka jingbthah ka ban jur ba kino kino ki riew shimet, kampher ia ka rta, kiba don ia ka jingshit met bad mih khniang, dei ban shim kum ka jingsuba ba mih’Niangpyrsit’ bad pyntip mardor sha ki jaka sumar ba marjan, ki Auxiliary Nurse Midwife (ANM) lane ki Doktor.
Kane ka sienjam ka wan hapdeng ka jingsngewkhia kaba jur halor ka jingsapriang ka jingpang na shiliang pud, ha kaba ki bor ka koit ka khiah kila ban jur ia ka jingkongsan ban lap kloi ia ka jingpang bad ban sumar mardor.
Ki lad jingiada ba kongsan :
1. Ki skul bad Anganwadi Centre ki dei ban pyntip ia kino ki briew ba suba mih ‘Niangpyrsit’ khlem ka jingpynslem sha ki bor ka tnad ka Koit ka Khiah.
2. Bud pyrrkhing ia ki kyndon ban kiar na ki para briew :
Ki Khynnah kiba pyni dak jingpang dei ban khang ba kin wan skul lane Anganwadi Centre tad haduh da koit pura. La ai jingmut ban set ialade ha Iing bad pynduna ia ka jingkynduh briew.
3. Pynkhlain ia ka jingiatreilang :
La bthah ia ki jaka pule bad Anganwadi Centre ba kin iatreilang bad ka Tnad ka Koit ka Khiah lem bad ka World Health Organisation ban ioh tohkit ha ka por ba biang bad ban tehlakam ia ka jingpur.
4. Ka jngpeit bniah bha :
La pynsngewthuh ia ki nonghikai bad ki nongtrei Anganwadi ba kin ithuh kloi ia ki dak jingpang. La buh kongsan ia ka jingpeit bniah manla ka sngi ia ka jingshit met bad jingmih khniang.
Ki bor ka tnad ka Koit ka Khiah kila maham ba u ‘Niangpyrsit’, uba iabit bha, u lah ban saphriang sted bha lada khein sting ia ki dak jingpang haba sdang. Ki bor District kila kyntu ia ki paidbah ba kin iatreilang bad ki jingbthah halor ka koit ka khiah bad ban pyntip mar mar ia ki dak jingpang ban tehlakam ia ka jingpur.
