Shillong, Iaiong 20: Ka BJP kan sa long ka seng saiñ pyrthei kaban leh ia ka bynta kaba khraw ha ka jylla Meghalaya ha u snem 2028 bad kan bteng ban pyniar ia ki dienjat ki jongka ha kylleng jong ka thain shatei lammihngi, la ong u National Secretary ka BJP uba khmih ruh ia ka Meghalaya u Anil Antony hynne ka sngi Nyngkong.
“Ha u 2028, phi lah ban khmih lynti ba ka BJP kan kylla long kum ka seng sain pyrthei kaba heh ha ka jylla Meghalaya ruh” la ong u Antony haba iakren bad ki nongthoh khubor.
Ula kdew ba ka seng kala nang kiew bha ha ka thain ha kine ki snem kiba la dep.
“Ha ki snem kiba la dep, ha kylleng jong ka thain shatei lammihngi, ka BJP kala nang pyniar ia ki dienjat ki jongka. Bun snem mynshwa ha ka thain shatei lammihgni, ka seng kam shim la don wat tang shi ‘Seat’ ruh. Mynta ha ki 7 ne 8 tylli ki jylla kadei kaba la synshar da ka NDA kynthup hapoh ka Meghalaya,” ula ong.
“Ha ki 4 tylli ki jylla, ka BJP kadei ka seng kaba heh paid tam ha Assam, Arunachal Pradesh, Manipur bad Tripura bad ha kiwei pat ki jylla, ka seng kala nang pyniar ia la ki dienjat. Kumta phin sa iohi ba ka seng kan sa nang iar bad kan sa ioh shuh shuh ia ki nongmihkhmat hangne” la bynrap u Antony.
Halor ki jingangnud jong ka seng hapoh ka jylla, “Kumba long ha kiwei pat ki jylla, ka seng ka don ia ka jingangnud ban long kaba wan nyngkong ha Meghalaya ruh.”
Halor ka jingpynkynriah ia ka elekshon jongka Garo Hills Autonomous District Council (GHADC), u Antony ula ong, ba ka BJP kadei kaba la pynkhreh bad la khmih lynti ba kan leh bha ha ka jingjop ki kyrtong.
“Ngi long kiba skhem jingmut. Ka elekshon ADC ha Garo Hills la dep ban pynkynriah hynrei ka BJP kadei kaba la pynkhreh pura ia ka elekshon hashwa ba kin mih ki jingjia ki bym lah ban mutdur. Ngi dei ka seng kaba nyngkong ban ia kiwei pat ki seng, ha ka jingpynbna ia ka kyrteng jong ki kyrtong ban iakhun ia ka elekshon” ula ong.
“Na ki 29 tylli ki Seat, jan baroh ki Seat (lait noh) ha ki 3 ne 4 tylli kiba ngi lah dep ban pynbna ia ki kyrtong bad ki kyrtong kila trei ha madan. Ha ka por kaba la dep, ngi lah ioh tang 2 Seat hangne. Mynta ka kynti, ngi ngin kiew bha ha ka jinglehbha ka jong ngi” la ong u Antony.
