Shillong, Iaiong 20 : Ka Bharatiya Janata Party (BJP) Meghalaya, kala pynshai ba kam shym la tyrwa ticket sha u Chief Secretary barim ka Jylla Bah DP Wahlang na ka bynta ka elekshon shiteng samoi ka Shillong Lok Sabha, haba pynpaw ba ka jingkren u nongialam ka party bad MLA ka Pynthorumkhrah Bah AL Hek ka dei ka kam ba shimet jong u ym ka rai jong ka party.
“Ngi kwah ban kren shai hangne ba ki jingkren jong u Bah AL Hek ba tyrwa ticket ia u Bah DP Wahlang, Chief Secretary barim ka Jylla, ka dei ka jingkren shimet jong u bad kam dei ka rai jong ka party” ong ka BJP ha ha kyrwoh.
“Kam don satia ka jingiakren ia kum kane ka jingtyrwa hapdeng ki nongialam bala rangbah jong ka BJP Meghalaya” ula ong.
Haba bayai ia ka rukom jied kyrtong jong ka party, ka kyrwoh ka ong “Ka BJP ka dei ka seng kaba don ia ki rule bad ki rukom treikam. Ka jingai ticket ka party na ka bynta kano kano ka elekshon ka hap ban iaid ia ki katto katne ki kyndon bala buh da ka Central Steering Group jong ka party”.
“Tang ka Central Parliamentary Board ka don ia ka bor ban jied ia ki kyrtong na ka bynta ka elekshon MP lane MLA; kata ruh tad hadien bala pynbna ia ka tarik jong ka elekshon” kala ong.
“Kano kano ka jingiakren ban ai ticket iano iano khlem da bud kat kum ki lynti treikam, kam mih satia ha ka party kum ka BJP” kala bynrap.
