Shillong, Iaiong 20: U National Secretary ka BJP ba khmih ia ka jylla Meghalaya Anil Antony ha ka sngi Nyngkong, ula kynthoh ia ka kynhun INDIA Bloc kaba la ialam da ka Congress ba pyn pulom ia ki 3 tylli ki Bill kiba kongsan kiba la wanrah ha ka 16-18 tarik u Iaiong ha ka dorbar kyrpang jongka Parliament, kaba kynthup ia ka 131st Constitution Amendment Bill kaba thmu ban pyniakhlad ia ka bhah ki kynthei na ka Delimitation ne ka jingphiah ia ki Constituency.
“3 tylli ki Bill la wanrah da ka Sorkar Pdeng hapoh ka jingialam u Myntri Rangbahduh ka ri da ka jingthmu ban pynthikna ba ki kynthei jong ka ri, kiba don palat ia ka 50% ha ka jingbun paid kin ioh lang ia ka lad kaba mar kumjuh bad ka jingbym noh shilliang ha ki kam kiba iadei bad ki kam synshar paitbah” la ong u Antony.
Ula kynnoh ba ki seng saiñ pyrthei ki ialeh ban pynslem ia ki kam thaw aiñ.
“Hynrei kaba sngewsih ha kine ki ar sngi jong ka dorbar, ki dkhot jong ka INDIA kiba kynthup ia ka Congress, Samajwadi Party, TMC, DMK kila pynthohbria ia ka Bill bad khatduh eh ia kane ka Bill kaba la wanrah da u Myntri Rangbah ka Jylla da ka jingthmu ban pynthikna ia ka jingai ia ka hok, ka jingbym shah liang ha ka jingiashimbynta ha ka jingjied ia ki kynthei ban ioh ban iaid shakhmat” ula ong.
U Antony ula ong, ba ka rekod treikam ne ka “track record” ka Congress kadei ban pyrshah ia ka Bill.
“Hapdeng u snem 1999-2003 haba u Myntri Rangbahduh ka ri u Atal Bihari Vajpayee, ka Sorkar NDA kala wanrah 4 sien ia ka Women Reservation Bill hynrei ka Congress ha kitei ki por ruh kala pynthikna ba kane ka Bill kam dei ban ioh ia ka jingmynjur hapoh ka Parliament,” ula ong.
Ha kaba iadei bad ka 2023 Act, ula kdew ba kadei kaba donbynta bad ka Census bad Delimitation kaba mut ban pyntreikam ha u snem 2034. “Ia kane ka dorbar la khot pynlong da ka sorkar NDA ban pynthikna ba kan ym pyniasoh bad ka Delimitation bad ban pynthikna ba ha u snem 2029 kane ka Bill kan sa urlong shisha” ong u Antony.
Ula bynrap ba u Myntri Kam Pohiing ka ri u Amit Shah ula dep ban pynthikna ia ki jylla ha kaba iadei bad ki jingsngewkhia ia ki Seat. “U Myntri Kam Pohiing ka ri ula kdew shai ba ma u bad ka sorkar ki kloi ban don ia kano kano ka jingpynkylla ba kin ym don kino kino ki jylla ruh kiban duh noh ia ki Seat kiba la don lypa ha man la ki jylla, kan don ka jingkiew kaba 50% ha ki jylla bad yn leh ha ka rukom kaba yn ym noh shilliang” ong u Antony.
“Man la ki jylla ha ka ri India kynthup ia ka Meghalaya kin iohi ia ka jingkiew ha ka jingdon ki Seat ha ka Lok Sabha. Kumba long mynta ka Meghalaya ka don 2 ngut ki MP Lok Sabha hynrei ka lah dei ban don noh 3 tylli ki Seat bad kan pynthikna ba iwei na ki 3 ngut ki MP ha ka jylla Meghalaya kan dei beit ka kynthei” ula bynrap.
U Antony ula ong, ba ka Delimitation kadei kaba la rim bah ha ka jingdon ki nongmihkhmat. “Ia u pud u sam la dep ban rai katkum ka Census ne Khanasamari kaba la dep leh khatduh ha u snem 1971 ha kaba ka jingdon ki nongshong shnong ha ka ri India ki long tang 54 Klur bad mynta ka jingdon ki nongshong shnong kala long 140 Klur”.
Ula kynnoh ba ki seng ha ka Liang Pyrshah ki sheptieng ban pynkup bor ia ki kynthei ha ka kam sain pyrthei.
“Ka Congress bad ki paralok ki jongka ki sheptieng ba ki kynthei kin ioh ia ka hok ha ka histori hapoh ka jingialam u Myntri Rangbahduh ka ri bad ba ka jingneh ka jongki kum ki seng saiñ pyrthei ka lah ban duh noh” la ong u Antony.
“Ka Sorkar u Modi kan iakhun tyngeh pyrshah ia kine kiba bor ka Liang Pyrshah kiba iakhun pyrshah ia ki kynthei. Ka por kala dei ia ki kynthei ki jong ngi ban pynphai kylla lyngba ka bor jong ka jingthep vote ka jongki bad ban kyndat noh sharud ia kine bad ia ki seng kiba leh pyrshah ia ki kynthei ha ka jingdon ha ka kam sain pyrthei kaba shi rta” ula ong bad ka bynrap “Ka BJP ka pynrem jur ia kane ka jingleh kaba khlemrain, ka rukom leh ka bym iahap ha ka kam synshar paitbah jong ki kynhun ha ka Liang Pyrshah ia kaba ngi lah sakhi ha ka 16 tarik u Iaiong hapoh jong ka Parliament.”
