Guwahati, Lber 23: U Chief Engineer jong ka Guwahati Municipal Corporation (GMC), u Indrajit Bora u la shah kem noh ha ki dkhot ka tnat Directorate of Vigilance and Anti-Corruption halor ka jingshah kynnoh donkti ha ka kam bamsap.
Kham hashwa la ioh pdiang ia ka jingujor da ka tnat Directorate of Vigilance and Anti-Corruption pyrshah ia une u ophisar. La kynnoh ba u Bora u la dawa T.10,000 na u nong ujor na ka bynta ban iarap ha kaba iadei bad ka security deposit kaba T.1.60 lak.
Ka kynhun ki heh sorkar na ka tnat Vigilance and Anti-Corruption wing ki la pynlong ka jingpynap shrip hynnin ka sngi Balang bad kem noh markhmat ia utei u ophisar katba u dang shim ia ka pisa T.6000 kaba dei ka bynta jong ka pisa kaba u la dawa.
Katkum ki heh katei ka tnat la ong ba ia kane ka pisa la ioh kurup na ka jaka shong jong u Bora bad kurup noh ia ka ha ka jingiadon ryngkat lang ki sakhi na ka kynhun ba laitluid.
“Ha ka jingkhynra hapoh ka iingsah jong utei u ophisar ba shah kynnoh bamsap la ioh ban kurup T.6,93,600 ka pisa, ki tiar electronic bad ki kot ki sla kiba iadei bad ki 19 tylli ki bank account kiba dei ha ka kyrteng jong une u ophisar bad kiba haiing hasem jong u,” ong u heh katei ka tnat iakhun pyrshah bamsap.
Pule lang ia kane: Sdang ka PWD ia ka kam thied jaka ban pynheh ia ka NH-6 sha ka surok 4 lane
