Shillong, Risaw 26 : Ki arngut ki nongialam sain pyrthei bala ih bha ka ri-lum Jaintia ha ka sngi Nyngkong kila kren halor ka kam tih dewiong ha kaba u State President barim ka NPP Dr WR Kharlukhi ula pynksan ia ka kam tih par kum ka hok tynrai bad u President ka Congress Vincent H Pala ula buh jingkylli ia ki jingkular ba bunsien ka BJP.
Haba kylli halor ka kam tih dewiong, u Dr Kharlukhi ula ong “Phi tip, ka kam tih dewïong ka dei ka mat kaba don ha dohnud jong nga, namar nga wan na ri-lum Jaintia. Wat ha Parliament ruh nga ju kren halor kane. Nga la ong ba ka kamai jakpoh ka dei ka hok tynrai jong ngi bad haba ki khang ïa ka kam tih dewïong ha ka district jong nga, nga sngew ba ki la shim noh ïa ka hok jong ki paidbah ka ri-lum Jaintia ban kamai jakpoh.”
Halor ki jingkular jong ka BJP ïa ki phra ngut ki MLA ba kan pynbeit ïa ka kam tih dewïong, watla ka party kam shym la lah ban pynurlong ïa ka jingkular jong u snem 2018 ban pynbeit ïa kane ka kam hapoh ka 180 sngi, u la ong, “Kane ka dei ka mat kaba ïadei bad ka NGT. Kumta, ngam tip ïa ki jingkular jong ka Sorkar bad jong ka ïingbishar. Lada don ka jingïa takhuh hapdeng ka Sorkar bad ka ïingbishar, kata ngam tip. Hynrei, mano mano ruh ki lah ban ai ka jingkular. To ngin peit ïa ka jingmih”.
Halor ka jinkren u Myntri Rangbah ka Jylla ïa ka rukom tih dewïong katkum ka jingstad saïan, u la ong, “Ki la pyrshang, ngam tip bha, Phi lah ban kylli ïa u Myntri Rangbah, hynrei nga tharai ba ki la pyrshang. Ngan sngewkmen shibun lada ki lah shisha ban pynim biang ïa ka kam tih dewïong ha ri-lum Jaintia, hynrei, ha kajuh ka por, nga tharai ba dei ban kylli ïa kane ka jingkylli na ki paidbah ka ri-lum Jaintia hi baroh kawei, hato ki sngewkmen ne em ïa ka rukom kaba ka Sorkar ka shim halor ka kam tih dewïong.”
Haba pynpaw ïa kajuh ka jingsngewkhia, u Bah Pala u la ong, “Ha kaba ïadei bad ka kam tih dewïong, kam dei tang ha ri-lum Khasi bad ri-lum Jaintia, hynrei ha ri-lum Garo ruh.
Nga tharai ba kane ka dei ka jingeh jong ka Jylla baroh kawei. Nga kwah ban pynkynmaw ïa kaei kaba u Dr Kharlukhi u la ong, ba ma u bad nga ngi la ïakynduh ïa ki Myntri, hynrei ym shym la don jingmih ei ei ruh em namar kim shym la shimkhia.”
U la ong, “Naba iwei napdeng jong phi ba kylli, ha u snem 2018, ka BJP ka la kular ha ka manifesto jong ka ba hapoh 180 sngi kan pynkylla ïa ka aiñ, hynrei kam shym la leh ïa kata, namarkata, nga hi ngam don jingkyrmen shuh na ki jingkular jong ka BJP. Nga thikna ba baroh kiba la pynïasoh sha ka BJP namar ki jingkular kin ïoh tang ki jingkular.”
U Pala u la bynrap, “Nga la ïohi ba bun ngut ki briew kiba la pynïasoh sha ka BJP ha ki por mynshwa, u Bah Justine Dkhar bad bun na ki paralok jong u ki la pynïasoh sha katei ka party, kila kular ïa ki shibun kiei kiei, hynrei ym shym la urlong ei ei ruh em. Ha kane ka kynti ruh, nga don ka jingsngewskhem ba kan ym mih eiei ruh em. Ki la pynïasoh sha ka BJP namar ka jingbym sngewïahap bad ka Sorkar MDA ne ka Sorkar NDA. Nga tharai ba don shibun ki jingiashrut hapdeng ki party kiba donlang ha ka sorkar, bad kata ka lah ban long ka daw ba ki la leit pynïasoh sha kiwei pat ki paralok kiba iadonlang ha ka Sorkar”.
U Bah Pala u la bynrap “Bun na ki ki la ong ba ka kham bha ban ïap kum u khla ban ïa kaba ïap kum u miaw. Kata ka dei ka jingeh. Lada phi peit ïa ki jingkren jong ki, ki la shim ïa ka rai katkum ki jingkyrmen jong ki. Teng teng ki jingkyrmen bad ki jingphohsniew jong phi ki urlong, hynrei teng teng kim urlong.”
