Shillong, 26 Risaw: U Myntri Rangbah ka Jylla Conrad K. Sangma, ha ka sngi Nyngkong u la shong bishar ïa ka jingshna pynthymmai ïa ka ïewduh bad bthah ïa ki ophisar ban pynsted ïa ki kam kiba dang ïaid, na ka bynta ka jingmyntoi jong ki nongdie mar, ki nongthied nongpet bad ki nongwan jngohkai pyrthei.
Haba thoh ha ka X, u Myntri Rangbah u la ong, “Nga la pynlong ïa ka jingïalang bad ka tnad Urban Affairs ban bishar bniah ïa ka jinglong jingman jong ki kam pynbha bad pynthymmai ïa ka ïew ba ieid eh jong ka nongbah jong ngi, ka Ïewduh.”
U la ong ba ka jingbishar ka la kynthup ïa ki bynta ba kongsan jong katei ka projek.
“Na ka jingshna ïa ki lynti ïaid kjat bad ka jingpynbiang um, haduh ki painkhana bad ka rukom pynkhuid ïa ki jaboh, ngi la bishar bniah ïa ki bynta ba kongsan jong ka projek.
Watla ka kam ka long kaba bun bad ki jingtrei ki dang ïaid shakhmat, la bthah ïa ka kynhun ban pynsted ïa ki kam na ka bynta ka jingbit jingbiang jong ki nongdie mar, ki nongthied nongpet bad ki nongwan jngohkai pyrthei,” ong u Conrad.
U Conrad u la ïathuh ruh ba u la ïakren halor ka jingpynbeit ryntih ïa ka jingai jaka hapoh ka MTC Building kaba tei thymmai ha Police Bazar.
“ Nga la ïakynduh ïa ki ophisar jong ka MIDFC ban ïakren halor ka jingpynbeit ryntih ïa ka jingai jaka hapoh ka MTC Building kaba dang shu tei thymmai ha Khyndailad, Police Bazar, da kaba pyrkhat ïa ka lad kamai jong katei ka jaka, ka jingkongsan jong ka ha ka kam jngohkai pyrthei bad ka jingdonkam ban pyndonkam hok ïa ka jaka,” u la ong.
