Shillong, Risaw 26 : U Myntri Rangbah Conrad K Sangma ha ka sngi Nyngkong ula iathuh ba ka Ministry of DoNER kala ai ia ka jingkyrshan ban pynlong ia ka 39th National Games ha Meghalaya.
“U Myntri ka Sorkar Pdeng ba khmih ia ka DoNER Shri @JM_Scindia ji ula pyniaid ia ka jingialang ban iakren ia ka jingiatreilang bad ka Ministry of DoNER na ka bynta ka 39th National Games ha Meghalaya” ong u Conrad haba thoh ha X.
Haba pynpaw ia ka jingsngewnguh ula ong “Nga sngewnguh ïa ka jingkyrshan jong u katba ngi trei shitom ban pynlong ïa ki National Games kum ka jingïalehkai kaba pynpaw ïa ka burom jong ka Meghalaya, bad kum ka rynsan ban pyni lang ïa ka sap ïalehkai bad ka jingriewspah ha ka kolshor jong ki jylla ka thaiñ Shatei Lammihngi.”
U Conrad u la pyntip ruh ba u GOC jong ka 101 Area, Lieutenant General Mohit Wadhwa, u la ïakynduh ïa u ban ïakren halor ki mat kiba ïadei bad ka jingïada ri.
“U Lt. Gen. Mohit Wadhwa, GOC jong ka 101 Area, u la wan ïakynduh ïa nga mynta ka sngi ban ïakren halor ki mat kiba ïadei bad ka jingpynrung kam shipai (Agniveer) na ka bynta ki samla ka Meghalaya, ka jingsiew jingïarap (ex gratia) sha ki longïing jong ki shipai kiba la khlad noh ha ka jingshakri ïa ka ri, ka jingtyrwa ban seng ïa ka Sainik School, ki prokram bapher bapher kiba thmu kyrpang ïa ki samla, bad kiwei kiwei,” ong u Myntri Rangbah ka Jylla.
