Shillong, Oct 26: Ka sha lyntem ka samoi ialehkai phutbol ka Shillong Sports Association, ka khreh ba kan jam sa sha kawei pat ka lympung ialehkai, ha kaba ki lahduh (champions) bad ba wan ba-ar (runners-up) jong baroh ki kyrdan iakhun (division), kin khreh ba kin iaknieh pat ban rah ia kawei ka nam lahduh bad katta ka dei ka Champion Cup 2026, kaba la sdang ban pynialehkai nyngkong ia ka mynshem snem.
Haba iadei bad kane, mynta ka sngi nyngkong jong ka taiew, ka SSA, ka la pynlong ia ka jingialang ban pyllait paidbah ia ka trophy jong kane ka lympung, ha ka jingialang ba la long ha conference room, ka SSA Stadium, First Ground, Polo.
Ia kane ka jingpyllait ia ka trophy, la ialam da u President ka SSA Bah Banteidor Lyngdoh uba long ruh u MLA, hadien ba seisoh ka jingpynlong ia kane ka jingiakob ha ka sien kaba nyngkong ha u snem 2025.
Baroh 10 tylli ki kynhun kila ioh pdiang ruh ia ka T.50,000 kum ka khusnam halor ka jingioh ban rung sha kane ka lympung iakob ialehkai kum ka jingai jingkyrshan ba kin lah ban pynkhreh bha na ka bynta katei ka lympung iakob ialehkai Football.
Ka Champions Cup kan wanrah lang ia ki nongjop bad kiba la wan baar ha baroh 5 tylli ki kyrdan iakob ialehkai football jong ka SSA ban iashimbynta lang ha kawei ka lympung iakob.
Ban pynlong ia ki kynhun ialehkai ba kin ioh ban bteng ia ki jingiakhun, kumta ki Club kiba na ka Second, Third bad Fourth Division la shah ia ki ba kin iasoi ia ki 5 ngut ki nongialehkai na ki kynhun ialehkai ha ka jylla ha ka dur jong ka jingshim kylliang ne Loan, katba ia kito kiba na ka Shillong Premier League bad First Division kidei ban pyndonkam da ki nongialehkai kiba lah dep rejistar bad ka SSA.
Kine ki kynhun kin iashimbynta ha ka League bad Knockout kaban sdang naduh ka 3 tarik u Naiwieng bad yn pynkut ia ka jingiakhun ia ka Final ha ka taiew kaba sdang jong u Nohprah.
Ki kynhun kiban iashimbynta ki kynthup ia ka Mawlai kaba long ka lahduh bad ka Shillong Lajong kaba wan baar ha ka SPL, ka Mawkhar kaba long ka lahduh bad ka Nongkrem ba wan baar ha ka First Division, ka Mawpat kaba long ka lahduh bad ka Sohryngkham kaba wan baar ha ka Second Division, ka Sanmer kaba long ka lahduh bad ka Lamlynti kaba wan baar ha ka Third Division, ka Mawpdang kaba long ka lahduh bad ka Sei La Sap FCC kaba wan baar ha ka Fourth Division.
Ka Nongkseh kaba la iohrah ia ka nam lahduh ha u snem 2025 kan ym ioh ban iakhun ha kane ka lympung namar ba kala wan balai ha ka SPL mynta u snem. Kaba mut kano kano ka kynhun kaba jop mynta ka kynti kan ioh ban long ka nongjop kaba thymmai noh.
Ka Lajong kadei ka kynhun kaba la ioh ban iakhun baroh arsien bad kala wan baar ha ka SPL ha u snem 2025 bad 2026 kala wan baar hadien jong ka Nongkseh ha ka jingiakhun kaba nyngkong jong ka Champions Cup. Ka Nongkseh kala jop ia ka Final da 2-1 ha ka Extra Time.
U Bah Banteodor Lyngdoh ula kitbok ia baroh ki kynhun ialehkai halor ka jingioh rung sha katei ka lympung iakob bad ka ong, ba ka SSA ka kwah ban iatreilang bad ki kynhun ialehkai ban pynlong ia kane ka lympung kaba kham shongshit shuh shuh bad kaba seisoh.
Ula bynrap ba ka jingthrang jong baroh kiba donbynta ha ka SSA ka long ban iohi shuh shuh ia ki samla trai ri ban ialehkai na ki kynhun kiba heh ha ka ri bad ban mihkhmat na ka kynhun ialehkai jong ka ri.
Ha ka Group A, ka kynthup ia ka Mawlai, Nongkrem, Mawpat, Lamlynti bad Mawpdang katba ha ka Group B ki kynhun ki kynthup ia ka Lajong, Mawkhar, Sohryngkham, Sanmer bad ka Sei La Sap. Ki ar tylli ki kynhun kiba wan hakhmat eh na ki Group kin ioh rung sha ka Semi Final.
Ia kane ka lympung yn plie da ka jingiakhun hapdeng ka Mawlai pyrshah ia ka Lamlynti ha ka por 2:30 mynsngi ha ka 3 tarik u Naiwieng ha SSA Stadium.
