Guwahati, Lber 23 : U Myntri Rangbahduh (PM) Narendra Modi un wan ban plie ia ka All India Institute of Medical Sciences (AIIMS) kaba nyngkong eh ha Assam hapoh Changsari ha ka 14 tarik u Iaiong 2023.
Na ka liang u Myntri Rangbah (CM) ka Assam u Himanta Biswa Sarma mynta ka sngi u la pynlong ka jingleit jurip ia ka jaka ha ryngkat ki heh sorkar ban bishar bniah ha kaba iadei bad ka jingpynkhreh na ka bynta katei ka jingialang.
Kham hashwa na ka liang u Myntri ka tnat ka koit ka khiah u Keshab Mahanta bad u chief secretary u Paban Kumar Barthakur ki la bishar bniah ha kaba iadei bad ki jingtreikam jong katei ka jaka sumar ha ryngkat ki heh na ka AIIMS nalor ki bor pyniaid jong ka Kamrup district ha ka 3 tarik mynta u bnai.
Na katei utei u myntri bad u chief secretary ki la hukum ia ki heh sorkar ba kin pyndep noh ia baroh ki jingtreikam kat haduh ka 31 tarik mynta u bnai.Kumba ka long mynta haduh 90 percent na ka jingpyntrei la lah ban pyndep ha katei ka jaka.
“Ia jingpyntrei ia katei ka hospital ka dang iaid shakhmat bad 18 tylli ki department mynta ki la jan sdang ia ki jingtreikam, kata kaba kynthup ia ka Out Patient Department (OPD)”, ong u CM Sarma haba kren sha ki lad pathai khubor.
Ha u bnai Nohprah jong u snem ba ladep, na ka liang u CM Sarma u la pynpaw ba ia ka AIIMS, Guwahati yn plie paidbah ha u snem 2023.
Shuh shuh u Sarma u la pynbna ruh halor kiba bun kiwei pat ki projek ki ban wan ha ka nongbah Guwahati, kata hadien ba u la leit jngoh sha Namghor Samaroh ha ki bynta shatei ka sorbah Guwahati.
Pule lang ia kane: Hapoh u Jylliew yn pyndep ia ka Pohkseh Water Supply Scheme
