Shillong, Naiwieng 22 : Jan kumba 4,500 ngut ki nongmareh na ki 30 tylli ki Jylla bad Union Territories, kila iashimbynta ha ka 6th edition jong ka Assam Rifles Half Marathon, 2026, kaba la pynlong ha Headquarter ka Directorate General Assam Rifles, Laitkor ha ka sngi U Blei.
Kum shibynta jong ka Fit India Movement, kane ka jingiakop mareh ba shisien shisnem, bala pynlong nyngkong eh ha u snem 2021, kala kylla long ka rynsan kaba paw bha ha kaban pynshlur ia ka koit ka khiah ka met ka phad, ka jingim kaba koit ba khiah, ka mynsiem ialehkai bad ka jingiatylli ka ri.
Ia kane ka lympung la pynlong hapdeng ki lum kiba itynnad ka East Khasi Hills ha Laitkor, kaba wanrah lang ia ki nongialehkai kiba tbit, ki briew kiba beh ia ka koit ka khiah ka met ka phad, ki shipai, ki samla bad ki nongshongshnong na ki bynta bapher bapher.
Ia kane ka Halef Marathon la pynlong ha ki lai bynta -Cloud Chase (21 km), Pine Path (10 km) bad Crystal Stream (5 km).
Ia ka jingiakop marreh ba 21 km la kaweh lama da u Lt Gen Vikas Lakhera, Director General Assam Rifles, ha ryngkat bad ka Vibha Lakhera, President ARWWA, Nitin Bhatnagar, Executive Director bad State Head, IO AOD, Indian Oil Corporation Limited, lem bad u Arunabh Sharma, AGM, RBO, Shillong Urban (SBI).
Ia ka jingiakop mareh ba 10 km la kaweh lama da u Maj Gen Jai Singh Bainsla, ADG Assam Rifles, bad kiwei, katba ia ka jingiakop mareh ba 5 km la kaweh lama da u Brig bad Mrs Swarn Singh lem bad Brig bad Mrs Sachinder Tiwari.
Ki nongiashim bynta kila ioh ia ki medal, ki syrnot bad ki T shirt. La sam ruh ia ka song pisa ba T.25 lak sha ki nongjop ha ki kyrdan bapher bapher nalor ki consolation prize.
Ha ka jingiakop mareh ba 21 km ki shynrang, u Panchana Bera ula wan ba nyngkong da kaba pyndep ia ka jingmareh hapoh ka 1 hour 8 minutes 10 seconds. Ha ka jingiakop ki kynthei pat, ka Munni Devi kala wan ba nyngkong da kaba pyndep ia ka jingmareh hapoh ka 1 hour 24 minutes 34 seconds.
Ha ka jingiakop mareh ba 10 km ki shynrang, u Ravi Chaudhury ula wan ba nyngkong da kaba pyndep ia ka jingmareh hapoh ka 31 minutes 35 seconds, katba Ruby Kashyap kala jop na ki kynthei da kaba pyndep hapoh ka 36 minutes 43 seconds.
U Air Marshal Mehtab Singh Deswal, AOC-in-C, Eastern Air Command, ula pynshong kun ia kane ka sngi kum u kongsan. Ula ai ka jingiaroh ia ka mynsiem ialehkai, ka jingkut jingmut jong ki nongiashim bynta bad ula sam ruh ia ki khusnam sha ki nongjop.

