Nongpoh, Lber 23: Da ka jingtynjuh jong ka seng Khasi Students Union (KSU)-North Khasi Hills, ki Pulit ka Anti Infiltration check gate ha Byrnihat kila trei borbah ia ka kam bad la sakhi ba jan kot da ki spah ngut ki bar Jylla ki bym don ia ki kot ki sla, kila shah pynphai biang sha Assam na kane ka khyrdop jan manla ka sngi.
Ka KSU-North Khasi Hills dang shen, kala byrngem ban leit pahara hi ia kane ka khyrdop namar ka jingioh rung laitlan jong ki bar jylla ba khlem kot khlem sla. Kane ka jingbyrngem kala mih hadien ka jingiohkem ia 90 ngut ki bar jylla ba khlem kot khlem sla, dang shen naka thain Umsning.
Ka KSU-NKH kala iakynduh ruh ia u Officer in-charge ka Anti Infiltration check gate kaba don ha Byrnihat ban pynbor ia une u Ophisar ba un trei hok ia ka kam bad ban pyrrkhing thikna ia ka jingrung kyrthep ki bar jylla ba khlem kot khlem sla.
Ki Pulit ba-ap khyrdop mynta kila pyrrkhing bha ia ka jingiaid ki kali kiba wan kiew na Assam bad kila pynlong ia ka jingkhynra naphang ia ki kali ban pynthikna ba ki bar jylla kin nym ioh rung khlem ki sakhi ba pynshisha ba ki dei ki nong India.
La sakhi ba baroh ki kali ba wan na Assam kila hap ban iaid lyngba kane ka khyrdop khamtam ki kali kamai tourist kiba la hap rung da u lain ban pyndep ia ka jingtalasi.
Pule lang ia kane: Wanrah u CM ia ka mang tyngka ba duna T. 1,592 klur jong u snem 2023-2024
