Shillong, Naitung 12 : Ka Sorkar Jylla ka don jingthmu ban pynheh ia ka Baljek Airport hajan Tura khnang ban lah pyniasoh ia ka liengsuin beit beit na ri-lum Garo sha ki Sorbah ka Ri kum ka Kolkata bad Delhi, ong u Myntri kam jngohkai Timothy D Shira.
U Shira ula ong ba ka jingpynheh kan shakri lang ia ka kam jngohkai bad ki trai shnong ka ri-lum Garo.
“Ngi kwah ia ka jingpyniasoh liengsuin beit beit na Baljek sha ki sorbah bapher bapher” ula ong haba bynrap ba ki nong leit nongwan mynta kin hap ban aid lyngba ka Guwahati ban poi sha Delhi, kaba la shim bun ka por bad ka jinglut.
“Lada ngi don ia ka liengsuin ba pyniasoh na Baljek Airport, kan pynduna shibun ia ka jinglut bad ngi lah ruh ban poi ha ka por kaba duna” ula bynrap.
Kat kum ka jingong jong u, ka jingkyntiew kyrdan kan pynkhlain ia ka lad pyniasoh ha ka thain bad pynsuk ruh ia ka leit ka wan ki briew na Western Meghalaya.
