Shillong, Risaw 06 : Kawei ka samla Garo ba 26 snem ka rta kala shah thombor bad shah lute ha ka kynhun ki suba nong dih droks ha ka thain Nongmensong, Shillong ha ka miet sngi Nyngkong.
Ki nongialam ka Village Defence Party (VDP) kila pyntip ba kumba 3-4 ngut ki briew ia kiba la suba ba ki dei ki nongdih droks, kila donkti ban leh ia kane ka kam. Uwei na kine la ithuh kum u Gunni.
Kane ka samla ka dei kaba la tip kyrteng kum ka Silvinia T Sangma, kaba shongwai ha Umkdait, Nongmensong. La iathuh ba kane ka samla ka dang iaid lynti najan ka dukan Reliance Trends ha ka por 9 baje mynmiet bad shah thombor da ki tiar ba nep bad shah lute ka pisa bad ka mobile phone.
Ka Samla kala mynsaw jur na ki bynta ka ryndang ha ka jingpyrshang ban phet na kine ki nongthombor.
Kawei ka longkmie kala wan ban ai jingiarap bad shem ba ka Silvinia kaba phlei snam, kala pyntip ba kala shah lute bad shah knieh ka mobile phone. Ia kane ka samla la pynkit noh mar mar sha NEIGRIHMS ban ai jingsumar.
Uwei na kine ki nongthombor la iathuh ba la ioh ban kem da ki paidbah tang hadien katto katne por ba jia kane ka jingjia.
Ki Pulit ki dang tohkit ia kane ka jingjia bad ki dang buddien ban ithuh ia kiwei pat ki runar.
