Shillong, Risaw 06 : U President ka BJP Meghalaya Mondal Rikman G Momin ha ka sngi Ba-ar, ula kyntait ia ka khubor ba ka party kala pyrkhat ban ai ticket ia u Nongaiktien ba hakhlieh duh bad Ophisar IPS barim Bah M Kharkrang ban long u kyrtong sha ka elekshon shiteng samoi ka Shillong Lok Sabha haba pynpaw ba ka jingthep aplikeshon mynta kala dep kut.
Haba kylli la ka party kan pyrkhat ban ai ticket ia u Bah Kharkrang, u Momin ula kren shai da kaba ong “Ngam tip”.
Ula pynshai ba ka party kala dep pynkut ia ka jingpdiang aplikeshon bad ia ka thup kiba kwah iakhun ia ka elekshon, lah dep ban phah sha ki nongialam ha Delhi.
“Kat ki aplikeshon ba ngi la ioh pdiang, la phah mynta sha ki nongialam ha Delhi” png u Momin uba iathuh baki don haduh 9 tylli ki kyrteng kiba la phahsha ki nongialam ba kin iashong pyrkhat bad shim rai.
Haba kylli la u MLA barim ka Nongthymmai Bah Jemino Mawthoh u dei uwei na kiba aplai, ula ong “Ngam lah ban iathuh ia phi ia mynta”.
