Shillong, Naitung 12 : Ka National People’s Party (NPP) kala nang khlain nangkhlain katba nang iaid ki sngi sha ka elekshon shiteng samoi ka Shillong Lok Sabha, da ka jingwan pyniasoh ki spah ngut ki nongkyrshan ka Congress na Mairang sha ka party ha ka sngi Saitjain bad pynbna ruh ban ai ka jingkyrshan ba pura ia u kyrtong ka NPP Dr DRL Nonglait.
Ia kine ki nongkyrshan ka congress la pdiang sngewbha ha ka jingialang paidbah bala pynlong da ka NPP ha Mairang.Ia kane ka kynhun la ialam da u President ka Mairang Block Congress Committee Bah R Nongsiej.
Haba kren ha ka jingialang, kine ki nongkyrshan ka Congress kila pynpaw ba kila rai ban mih noh na ka congress bad ban ai ka jingkyrshan ba pura ia u Dr Nonglait ha kane ka elekshon shiteng samoi ka Shillong Parliamentary seat, kaba la khmih lynti ban sa pynbna noh shen da ka Election Commission.
“Kane ka dei ka dak kaba shai kdar ba ka NPP kala nang kiew nang kiew katba nang iaid ki sngi bad kala nang ioh ia ka jingkyrshan na ki paidbah ha kylleng ka ri-lum Khasi bad Jaintia” ong u Bah Nongsiej haba pynpaw “Ngin iatrei shitom na ka bynta u Dr Nonglait”.
Ki Nongialam ka party kiba la iadonlang ha ka jingialang kila ong ba ki paidbah kila khmih mynta sha ka Synshar khadar kaba skhem kaba iaid ryngkat bad ka roi ka par.
“Ki paidbah kila sngewthuh ia ka jingdonkam ia ka Sorkar kaba trei ryngkat ryngkat bad ki kam pynroi ban kyntiew ia ka Jylla” ong ki nongialam ka NPP.
