Shillong , Naitung 12: Ka Meghalaya kan pynlong lang ia ka jingjurip madan na ka bynta ka jing pynlong ia ka Shad Wangala ha Tura hashwa jong ka jingrakhe ia ka Jubili Ksiar jongka ‘1000 Drums Wangala’ ong u Myntri ka tnad jngohkai u Timothy D Shira ha ka sngi Thohdieng.
Ia kane ka jingphah jurip la bthah da u Myntri Rangbah ka Jylla.
U Shira ula ong, ba ka jingrakhe ia kane ka tamasa mynta ka snem kan dei kaba heh bha ban ia ki snem kiba la dep.
“Ngi khmih lytni ba ki paitbah kiban wan kin bun bha namar ba kan ym dei ka ‘100 Drums Wangala’ hynrei katkum ka jingpynbeit kan dei noh ka ‘1000 Drums Wangala'” ula ong.
“Ngin hap ban khmih bniah la katei ka madan kan lah ne em ban pdiang kumba 1 lak ngut ki briew, kaban don ia ka jaka pynieng kali bad ban peit ruh ia ka surok la ka donkam ne em ban pynheh shuh shuh”.
Kane ka kynhun kaban jurip kan kynthup ia u Commissioner & Secretary, DC, SP bad ki dkhot jongka Wangala Committee.
Yn sa pynlong ruh ia ka jingialang kaban buddien hadien ba la aiti ia ka kaiphod sha u Myntri Rangbah ka Jylla.
Halor katei ka jaka, u Shira ula ong, ba ka sorkar kala dep shim 70 hektar ha Gongnagre, hapdeng Jingjal, Williamnagar bad Samanda, ban shna pynbha kum ka jaka na ka bynta ka Me’nong Festival bad kiwei kiwei ki tamasa. Hynrei iaka jingrakhe Jubili Ksiar jong ka Wangala yn ym pynkynriah satia.
“Katei ka jaka kadei kaba la longtrai da ka Wangala Committee, kumta ngin rakhe ia katei ka Jubili Ksiar ha katei ka jaka. Ka jaka kaba thymmai kadei kaba bun ki niut ki nier bad kan shim por ban dang shna. Ban pynkynriah mynta kan pynduna noh ia ka jingmut bad ia ka jinglong kordor jong ka Wangala Festival” ula ong.
