Shillong, Naitung 11 : San ngut ki nongbylla kila iap na ka jingioh ring mynsiem da ka tdem generator katba ki dang pump um na kawei ka pukri ha ka shnong Lapalang, Shillong.
Ki Pulit kila pyntip ba kane ka jingjia kala jia ha ka janmiet sngi Thohdieng ha ka por kumba 7.30 baje eiei, ha kawei ka jaka ba pyntrei iing ha Lapalang.
Kat kum ka jingiathuh ki heh Pulit, saw ngut ki nongbylla kila pump ia ka um hapoh jong kane ka pukri bad kila iap-op na ka tdem kaba mih na u generator. Ha ka jingpyrshang ban iarap ia ki, arngut ki shipara kila hiar sha kane ka pukri hynrei ki ruh kila kylla lanot lang.
Ki kynhun ai jingiarap kila lah ban sei ia baroh ki lanot hynrei, san ngut napdeng jong ki, la pynbna ba kila iap.
Kiba iap ki kyrteng u Umesh Thakuri (30), Sunil Thakuri (34), Pynskhemlang Mawthoh (22), Rapborlang Nongspung (35) bad Elka Shadap (25).
Ki pulit kila register case halor kane ka jingjia bad ka jingtohkit mynta kala iaid shakhmat.
