Shillong, Nailar 02 : Ka Synjuk ki Rangbah Kur ka Bri U Hynniewtrep kala pynsdang ia ka jingialap ba thymmai ban pyni ia ki dorbar kur, bad ki Nongialam kila kynnoh ia ka Khasi Hills Autonomous District Council (KHADC) ba kam shym la lah ban ai jingiada ia ka riti dustur u Khasi.
Da ki spah ngut ki nongialam kur, ki khieh nongsynshar bad ki riewshemphang kila ialum lang ha ka Dorbar Hall ha Smit-kaba dei ka jingiakynduh ba nyngkong jong ka “Tipkur Tipkha Movement”.
Kane ka jingiakhih, ka ban treikam ha baroh ki jaka ha ri-lum Khasi bad Jaintia kiba hap hapoh ka KHADC bad JHADC, ka thmu ban pynkhlain ia ki Seng Kur bad Dorbar Kur kum ki Unit ba kongsan eh ha ka jingithuh kyrpang ia ki Khasi-Jaintia.
Hapoh ka jingpyniaid u President ka SKRK Bah RL Kharpran, kane ka jingialang kala iakren halor ki mat kiba ki nongkren kila pynpaw ba ki dei ki lai mawbyrsiew jong ka Jaidbynriew : Ka jaka puta, ka ktien ka thylliej bad ka jingai pateng sha ka Kmie.
U General Secretary ka SKRK Bah Raphael Warjri ula pynpaw ia ka jingialang bad ka jingiathuh kyrpang jong ki Khasi ka iaid lyngba ki Kmie.
Ka jingialang kala pynrem jur ia ka Executive Committee ba synshar mynta ia ka Khasi Hills Autonomous District Council (KHADC).
U Nongaiktien ka SKRK Bah RL Blah bad u nongaibuit Bah Robert June Kharjahrin, kila pynrem jur ia ka Council, haba kynnoh ba kala ailad jar jar ia ka jingai jait kpa ba kan suhthied bad pyntlot ia ka riti bat khyndew nala tynrai jong ka Jaidbynriew.
Kila ong ba kum kine ki kam ki pynkhein ia ka jingmut jong ka Sixth Schedule ka Riti Synshar ka Ri, kaba thmu ban iada ia ka riti ka dustur bad ka synshar dalade jong ki riewlum.
Kine ki arngut ki nongialam kila kyrpad ia ka Council ba kin nym ailad ia ki jingleh ki ban pyntlot ia ka jingai pateng sha ka Kmie bad ka jingpyniaid ka shnong ia ka jaka.
Kiwei kiba ai jingkren ki kynthup ia u Dr Marco Mitri, Chairman ka Mawlai Town Dorbar, uDr Bakhiamon Rynjah bad Bah Khroo La Pariat, President ka Dorbar Waheh Kur Ri-Jaintia.
