Shillong, Nailar 01 : Haduh 7-8 tylli ki Iing kila pluh ha ka thain Rilbong, marjan ka Iingdorbar Thawain ka Jylla ha ka janmiet sngi Thohdieng.
Kat kum ka khubor Pulit, kane ka jingpluh kala jia ha ka por 3:30 baje janmiet hynrei donbok ba ym shym la don kano kano ka jingjia ba sngewsih.
Ki sakhi ki kam ba kane ka jingpluh ding kala jia na ka jingbthei ka tyndong lyer shet jingshet.
Hynrei ki Pulit ki ong ba ia ka daw tynrai ym pat lah satia ban pynthikna bad ka jingtohkit mynta kala iaid shakhmat.
U MLA ka thain bad Myntri Sorkar Bah Sanbor Shullai u iathuh ba kila don ki briew ba pyntip ia u shaphang kane ka jingjia bad mar mar ula pyntip sha ki Pulit bad Fire Service.
Ki kali pynlip ding kila poi ha ka thain bad kila lah ban tehlakam ia ka ding shuwa ba kan pur sha ki iing ba marjan.
