Shillong, Naiwieng 17: U kyrtong ka NPP u Dr DRL Nonglait u la iathuh ba ula hiar sha jan baroh 36 tylli ki constituency ka Khasi-Jaintia ha ki san bnai jong ka jingialap ilekshon na ka bynta ka ilekshon shiteng samoi ka Shillong Lok Sabha, bad u ong ba ka jingkyrshan jong ki paidbah ka long kaba biang bha ha man la ki jaka.
Haba kubur ba um pat pyntip ia ka tarik ilekshon MP shiteng samoi, u Dr Nonglait u la ong un nang pynkhlain shuh shuh ia ka jinghiar ialap ilekshon ha kylleng ki jaka.
“Nga la ialap ilekshon la palat san bnai mynta bad nga lah ban ong ba ka jingkyrshan ka long kaba bha bad ngan bteng ia ka jingialap ilekshon jong nga, namar kumba ka long mynta ym pat pynbna ia ka tarik ilekshon, kumta ngan bteng ban leit ialap ilekshon ban ioh iaka jingkyrshan naki paidbah,” u la ong.

U la iathuh ba ula dep ban hiar sha jan baroh 36 tylli ki constituency hapoh ka Khasi-Jaintia ha kaba ula dep ban pynlong ar ne lai tylli ki jingialang ha ki katto katne ki shnong bad mynta u dang thmu ban pynlong ia ka jingialap ilekshon haka wat kaba ar.
“Nga la leit sha jan baroh ki 36 tylli ki constituency, ki don ki constituency kiba nga la dep pynlong jingialang la 2-3 sien bad mynta ngan sa pynbeit biang ban pynlong ia ki jingialang,” u la ong.
Ula ong ba ka jingtrei shitom jong u kan pyniakhlad ia u na ki jingkylla ha ka sain pyrthei bad na ka jingbym thikna mano pat ban iakhun haka ilekshon MP shiteng samoi.
“Ngam tharai, katba nga nang lah ban iakynduh ia ki paidbah, katta nga nang ioh jingkyrshan,” u la ong, haba la kylli hato ka jingkylla ka sain pyrthei ka lah ban long ka mawjynthut ban poi shaka jingjop.

“Ngam donkam ban pyrkhat la ka BJP ne kano kano ka seng sain pyrthei kan pynieng kyrtong ne em hynrei na ka liang jong nga ngan iai bteng ban ialap ilekshon” u la bynrap. “Kumba nga la dep ong, ka jingkyrshan paidbah ka long kaba bha”.
U Dr Nonglait ula kam ba ka jingioh 8 ngut MLA ka BJP kan nym pynduh jingkyrmen ia u ha kane ka ilekshon MP shiteng samoi.
“Ngam don jingtip ei ei la ka BJP ban pynieng kyrtong ne em hynrei watla nga hap ban iakynduh ia ki katto katne ki nongialeh pyrshah, ngam don kano kano ka jingartatien ban jop ha kane ka ilekshon,” u la ong.
U Dr Nonglait u la kynthoh ia ka jingiatylli halor ka jingdawa ia ka ktien Khasi, da kaba ong ba ka jingkyrshan jong ka BJP ban pynrung haka khyrnit kaba phra ka dei ban pynkhlain, ym ban pyniakhlad ia ka daw.
“Namar ba ngi ialeh na ka bynta kajuh ka mat, nga tharai ba ka long kaba bha, nga mut ban ong baroh lang, ngin ialeh na ka bynta kajuh ka mat,” u la ong. “Kam pher la ka BJP ne kano kano ka seng ka shim ia ka burom na ka bynta katei ka mat hynrei kaba donkam ka long ba ka jingdawa kadei ban urlong”.

U la kyntait ia ka jingkynthoh u President ka MPCC ban thep vote pyrshah ia ki kyrtong ka NPP bad ka BJP namar ki ju thep vote ban kyrshan ia kano kano ka Bill kynthup ia ka CAB, kaba iaid pyrshah ia ka jingsngew jong ki paidbah ka jylla.
“Ka CAB ka dei kawei pat ka mat bad ka jingpynrung ia ka Ktien Khasi ha ka khyrnit kaba phra ka dei kawei pat ka mat, baroh ki party ha Meghalaya ki kyrshan ban pynrung ia ka Ktien Khasi ha ka khyrnit kaba phra” u la ong. “Kumta, ngi kyrmen ba kan ym don kano kano ka jingiatyngkhuh hapdeng ki sengsain pyrthei, kawei pa kawei na ki seng sain pyrthei na Meghalaya kan kyrshan ban pynrung ia ka Ktien Khasi ha ka Khyrnit kaba phra.”
Halor ka CAB, u Dr Nonglait u la kyntait ban kren eiei, da kaba kdew ba katei ka bill ka la sdang hashuwa ba in rung shaka NPP. “Ka jingsngewkhia jong nga ka long ba ka ktien Khasi bad Garo kin ioh jaka ha ka khyrnit kaba phra” u la ong.
Haba kylli kyrpang shaphang ki constituency jong ka liang pyrshah, u Dr Nonglait u la ong ba ka jingkyrshan kaba u ioh ka la long kumjuh ha man la ki jaka.
“Ka jingkyrshan paidbah ha baroh ki constituency ka long kaba bha. Ngam iohi ba ka jingkyrshan kan hiar namar kumba nga ju ong, nga iajan bad ki paidbah, bad kumta ka jingkyrshan jong ki ruh ka long kaba bha,” u la ong.

