Shillong, Naiwieng 18: U President ka Federation of Shillong Hotels Parambir Singh, ha ka Sngi Ba-ar u la maham pyrshah ïa ka jingpynsangeh noh ïa ka Projek Shillong Peak Ropeway hapdeng ka jingïaid jong ka kam, da kaba ong ba ka jingpynphai dien ïa ka projek kaba la dep mynjur naduh ki snem kiba la leit noh kan buh ïa ka Jylla ha ka dur kaba sniew bha.
“Katkum ka jingsngewthuh jong nga, ïa kane ka projek ropeway la mynjur naduh u snem 2023 bad baroh ki jingbit kiba donkam la dep ban shim da ka Sorkar,” ong u Singh haba jubab ïa ka jingkylli halor ka jingïakhih kaba dang ïaid pyrshah ïa ka projek ropeway.
U la ong ba um don ha ka kyrdan ban bishar ïa ka jingktah jong kane ka projek ïa ka mariang.

“Ngam dei u briew uba tbit ha ki kam mariang. Ngam tip ïa katei ka jaka, kaei ka jingktah jong ka projek ïa ka mariang bad ïa ki tyllong um ha katei ka thaiñ,” u la ong.
Watla katta, u Singh u la ong ba ka Sorkar ka dei ban bishar bniah ïa kane ka kam lada ka jingktah jong ka projek ïa ka mariang ka long kaba jur.
“Khlem artatien, lada ka jingktah ka long kaba jur, ka Sorkar ka dei ban peit bniah ïa kane,” u la ong.
Ha kajuh ka por, u la kyntu ban sa bishar bha ia ka kam, haba pynpaw ba ka jingpynduh noh ïa ka projek kaba la dep mynjur la kumba lai haduh saw snem mynshwa kan phah ïa ka khubor kaba bakla.
“Hynrei, katkum ka jingsngew jong nga, kaei kaei kaba la dep mynjur la kumba lai haduh saw snem mynshwa, ban pynphai dien bad pynduh noh ïa ka projek kumne kan buh ïa ngi ha ka dur kaba sniew bha. Nga pyrkhat ba donkam ïa ka jingpyrkhat bha na baroh arliang,” ong u Singh.
U la bynrap, “Lada kane ka kam ka long kaba jur shisha, nga sngew ba ka Sorkar ka dei ban shim ïa ka rai. Lym kumta, ym dei ban pynsangeh ïa ka projek hapdeng ka jingïaid ka kam.”

