Shillong, Nailar 02 : Ka Meghalaya kala ioh T.688 klur kum shibynta na ka jingai lypa ia ka bhah khajna bala pyllait da ka Sorkar Pdeng ban iarap ia ki Jylla ba kin pynsted ia ki capital project (jingai pisa ban kynshew sha ki jingdon jingem ne jingtei kiba kongsan) bad ka jingpynlut ha ki kam pynroi pynpar.
Ka Ministry of Finance ha ka sngi Saitjain kala pyllait T.1,09,019 klur sha baroh ki Jylla kum ka instalment bynrap, kaba kham bun ban ia ka jingai bhah khajna ba man u bnai kaba la dei ban ai ha ka 10 tarik Nailar. Ka Sorkar Pdeng ka ong ba kane ka jingpyllait lypa ia ka khajna ka thmu ban pynkhlain ia ka pla tyngka ka Jylla bad pynlah ia ka Sorkar ba kan pyntrei sted ia ki jingtei bad pyntreikam ia ki prokram ba iadei bad ka bha ka miat.
Napdeng ki Jylla ka thain Shatei Lam Mihngi, ka Assam kala ioh bun eh ia ka bhah kaba kot T.3,552 klur, bud sa ka Arunachal Pradesh-T.1,476 klur. Ka Meghalaya ka ioh T.688 klur, kaba duna khyndiat ia ka Tripura-T.699 klur hynrei kham heh ia ka Manipur –T.682 klur, Mizoram-T.615 klur, Nagaland-T.524 klur bad Sikkim-T.365 klur.
Kane ka jingpyllait lypa ia ka khajna la khmih lynti ba kan plie ka lad ia ka Meghalaya ba kan pyniaid shakhmat ia ki project jingtei, ki lad pyniasoh sha ki jaka kyndong, ka pule dangle, ka koit ka khiah bad kiwei ki kam pynroi khlem da ap ia ka jingsam bhah haduh ka 10 tarik Nailar.
