Shillong, Nailar 02: Ka Jylla Meghalaya, kaba la tip kum ka jaka kaba kaba ioh bun bha ia u slap ha ka pyrthei, hynrei kala sakhi ia ka jingioh duna bha ia u slap mynta u snem, ha kaba ka jylla kala ioh ia ka rekob kaba duna haduh 58% u slap hapdeng jong ka 1 tarik u Jylliew haduh ka 31 tarik u Naitung, katkum ka jingpynbna kaba la pynmih da ka India Meteorological Department (IMD).
Ka jylla kala ioh pdiang ia u slap uba 681.5 mm kaba long pyrshah ia kaei kaba ju ioh baroh shi katta kaba long 1,626.2 mm, kaba la buh ia ka Meghalaya ha ka kyrdan jong ka jingioh duna ia u slap.
Ka jinglong jingman ka long kaba sngewkhia bha thik na ka bynta u Naitung. Ka jylla kala ioh pdiang tang 3.4 mm u slap kaba long pyrshah ia ka jingioh slap kaba baroh shi katta kaba long 20.1 mm, ka jingduna kaba la kot haduh 83% ia kaba la shim kadei ka jingduna kaba khraw bha.
Kane ka jingduna slap kadei kaba la jia ha kylleng jong ka jylla, ha kaba 10 tylli na ki 11 tylli ki district jong ka Meghalaya kila iohpdiang duna bha ia u slap kaba la iapher bak la bak na ki por kiba la leit.
Napdeng ki district kiba la shah ktah jur:
West Jaintia Hills: Ka jingduna slap ka long haduh 78%.
West Khasi Hills: Ka jingduna slap kala kot ia ka 71%
West Garo Hills: Ka jingduna slap ka long 69%
East Jaintia Hills: Ka jingduna slap kala kot ia ka 67%
North Garo Hills: Ka jingduna slap ka long 64%
East Garo Hills: Ka jingduna slap ka long 59%
South West Garo Hills: Ka jingduna slap ka long 54%
East Khasi Hills: Ka jingduna slap kala kot 50%
South Garo Hills: Ka jingduna slap ka long 50%
Ri Bhoi: Ka jingduna slap ka long 46%
Ka South West Khasi Hills kala ioh pdiang haduh 1,917.8 mm u slap kaba la long palat ban ia kaba ju ioh ia u slap uba 1,049.5 mm bad kane kala lam sha ka jingioh kyrhai kaba 83% bad kane kala pynlong ban don ha ka kyrdan kum kaba ioh pahuh bha ia u slap.
Kine ki jingtip ki banjur ba kala don ka jingbym ryntih ka rukom ioh slap hapoh ka jylla Meghalaya ha kane ka aiom lyiur kaba mynta.
Watla kiba bun ki jaka jong ka jylla kila sakhi ia ka jingjur u slap, hynrei ka jinglong jingman ha baroh kawei jongka rukom slap kala long kaba duna bha ban ia kaba ju slap baroh shi katta, kane kala pynsngewkhia ia ka jingdon jong ka um, ka rep ka riang, ka jingkiew um ha ki jaka pynlang um, lada jia ba kane ka jingbym ioh slap kan dang bteng ha kine ki taiew kiban dang wan.
Ka IMD, kala batai lypa ba kan sa don ka jingslap bha ha ka thain shatei lam mihngi jong ka ri ha u Nailar, kaban ai jingkyrmen ba ka jingduna slap ka lah ban hiar noh ha kine ki por kiba dang sah jong ka aiom synrai.
.){kind=link}