Shillong, Jylliew 28: Ka Meghalaya Cricket Association (MCA) kala weng kam shipor ne ‘Suspend’ ia u Honorary Secretary Bah Rayonald Kharkamni bad kala pynduhkam syndon shirta jingim ne ‘Life Ban’ ia u Head Coach bad Manager ka kynhun ialehkai Under-23 Women, hadien ba ka Meghalaya State Commission for Women (MSCW) kala shem ba kala don ka jingleh khlem akor (Sexual Harassment) bad ka jingpyrshang ban buhrieh ia kane ka jingjia kaba la jia ha u snem 2025.
Haba pynbna ia ki sienjam kiba la shim da ka Association, u President ka MCA bad MP ka Rajya Sabha James K Sangma ula ong, ba u Secretary Bah Rayonald Kharkamni ula shah suspon mardor katba ka jingbishar ka dang iaid shakhmat, kaban pynlong da u Ombudsman ba laitlud ka Association, uba dei u Nongbishar ba la shong thait ka High Court.
U Head Coach Hemant Roy bad u Team Manager Sanjay Mondol kila shah wengkam syndon, hadien ba ka MSCW kala pynmih ia ka hukum ha ka 5 tarik u Jylliew ba shem ba ka jingleh ka jongki kadei shi bynta jong ka Sexual Harassment of Women at Workplace (Prevention, Prohibition and Redressal) Act, 2013.
“Ym don jaka sitia ban leh ia ki kam khlem akor ne sexual harassment hapoh ka MCA. Kan ym don jaka ruh ia kino kino kiba iadonbynta lang ha katei ka jingleh ka bym iahap satia” ong u James Sangma.
Ka kaiphod jong ka jinglap yn sa phah sha ka Board of Control for Cricket in India (BCCI), ula bynrap.
Ka hukum kaba ar jong ka MSCW bala pynmih ha ka sngi Thohdieng, kala shem ba 4 ngut ki nongialam jong ka MCA kim shym la leh eiei halor ki jingujor kaba la phah da ka kynhun ialehkai ki kynthei ha ka email jong ka MCA ha ka 2 bad 3 tarik u Nohprah 2025. Ka Commission kala shem ba ka Association kam shim la thung ia ka Internal Complaints Committee kumba la pynkup bor da ka aiñ.
Kiba la shah jer kyrteng halor ka jingbym shimkhia bad ki bym shim la bud ia ki kyndon treikam jong ka POSH Act, 2013 ki kynthup ia u President barim u Nababrata Bhattacharjee, u Secretary ba mynta Bah Rayonald Kharkamni, u Operations Manager Bah Shining Star Lyngdoh bad Treasurer barim u Dhrubajyoti Thakuria.
Ka Commission kala shem ba wat hapdeng ka jingtip shaphang ka jingujor, ym shim la don wat tang uwei ruh napdeng kitei ki 4 ngut kiban sdang ia ka jingtohkit, ban iakren bad ki nongujor ne ban pyntreikam ia kano kano ka shnat treikam kaban khmih ia kane ka jingujor. Ka jingbym don ia ka Internal Committee kaba dei na ka bynta ki nongialehkai ba kin ioh ban ujor bad ban shimkhia noh mardor ia ki jingujor.
Ka Commission kala bthah ia u President ka MCA bad Ombudsman ban sdang noh mardor ia ki jingshim ia ki sienjam pyrshah ia kitei ki nongpyniaid kiba la dep ban jer kyrteng bad ban aiti ia ka kaiphod pyntreikam ka jongki hapoh jong ka 30 sngi.
U Sangma ula ong, ba yn sa ai da ka ‘Show Cause Notice sha kitei ki 4 ngut ki nongkitkam ba kin phah ia ki jubab hapoh ka 30 tarik u Jylliew.
Ia kine ki jingpynpaw ki jongki yn sa aiti ha u Ombudsman Justice (Retd.) Gauhati High Court u B.D. Agarwal, kumta kitei baroh 4 ngut ia mynta kin shah suspon shwa tad haduh ba u Ombudsman yn ai ia ka rai kaba khatduh.
Haba kaba iadei bad ka jingsaphriang ki khubor ba u Bah Kharkamni u don jingthmu ban iakhun pyrshah ia ka hukum jong ka MSCW hapoh ka iingkashari, u James Sangma ula ong, “Ka paw kumba u Bah Kharkamni u ngeit ba ka MCA kadei ka juh hi kum ka ophis jong u Secretary. Lada u kwah ban leit sha ka iingkashari, un leit hi dalade shimet bad kum u riewshimet. Ka MCA kam ju siew ia ki jinglut jingsep ha kaba iadei bad ki kam mukotduma na ka bynta ki briew kiba donkti ha ki kam leh khlem akor ne Sexual Harassment.”
U James Sangma ula iathuh ba ka MCA kala pynlong ia ka jingialang jongka Apex Council ha ka 9 tarik u Jymmang halor ka jingbym kohnguh ia ka hukum suspon ba la pynmih da ma u ha ka 7 tarik u Jymmang bad ka jingpynneh ia u Ombudsman ha ka 8 tarik u Jymmang.
Ula ong, ba ia katei ka jingialang la khot da u Bah Kharkamni khlem ka jingioh jingbit na u President kaba long ka jingpynkhein ia ka Article 29 jongka MCA Constitution. U Vice-President ula pyniaid ia ka jingialang hadien ba la pynbna ia ka jingpep jong u President. Ha katei ka juh ka jingialang, u Bah Kharkamni ula wanrah ia ka mat ban pynsangeh shuwa ia ka jingthung ia u Ombudsman kaba u (President) la pynskhem ha ka 7 tarik u Lber.
“Wat hapdeng ka jingai hukum ka jong nga. Ka jinghukum jong u Ombudsman. U Secretary ula iaid beit shakhmat ha kaban pynlong ia ka jingialang” ong u Sangma.
Ula pynbna ba ka jingialang kaba la long ha ka 9 tarik u Jymmang kadei kaba la pulom bad baroh ki Resolution kiba la ai jingmynjur kidei kiba la suspon lut.
U Sangma ula ong, ba yn sa thung noh ia ka Internal Complaints Committee khlem da pynslem shuh kaban kynthup lang ia ki dkhot kiba dei ki kynthei bad shynrang kumba la bthah bad pynkup bor da ka kyndon 4 jongka POSH Act.
Ka MCA kan pan ruh ia ka jingiarap na ka MSCW lada donkam bad ban thaw ia ka Anti-Sexual Harassment Policy bad yn pynlong ruh ia ki prokram ai jingpynsngewthuh ia baroh ki nongkitkam, ki Coach, Selector bad Support Staff.
“Kadei kane kata ka dawbah ba balei ki nongialehkai cricket kynthei jongka Under-23 kim shim la ioh ia kano kano ka jingpynbeit. Ym shim la don ia kano kano ka jaka ne lad ba kin leit. Ngi dang pynbeit ia kane” ong u Sangma.
Ka hukum kaba la pynmih da ka MSCW ha ka 26 tarik u Jylliew kala kdew ia ka jinglap ia ki kaiphod jong ka jingdon ia ki dawai (contraceptives) ban iada na ka jingpun khun ha ki kamra jong ki nongialehkai ha ka Hotel ha Nongpoh kaba la pyndonkam kum ka Women’s Cricket Camps bad la bthah ia ka MCA ba kadei ban pynsangeh noh ban pyndonkam.
U James Sangma ula pynthikna ba ia katei ka jingbthah yn sa pyntreikam noh mardor hi.
Ka Commission kala kdew ruh ba kala don ka jingkynnoh ban leh eiei pyrshah ia ki ba ujor, kynthup ia kaba phone ban pynduh mynsiem ia ki nongialehkai ban kin leit ban ujor bad ka byrngem ban dawa bai mynrain na ka iingkashari, da kaba pynpaw ba ia ka “Confidentiality Obligations” hapoh jong ka Section 16 jong ka POSH Act kadei kaba ym shim la pynneh satia
 kala weng kam shipor ne ‘Suspend’ ia u Honorary Secretary Bah Rayonald Kharkamni bad kala pynduhkam syndon shirta jingim ne ‘Life Ban’ ia u Head Coach bad Manager ka kynhun ialehkai Under-23 Women, hadien ba ka Meghalaya State Commission for Women (MSCW) kala shem ba kala don ka jingleh khlem akor (Sexual Harassment) bad ka jingpyrshang ban buhrieh ia kane ka jingjia kaba la jia ha u snem 2025.){kind=link}