Shillong, Nailar 31 : U Nongialam ka BJP bad MLA ka Pynthorumkhrah Bah Alexander Laloo Hek ha ka sngi Nyngkong ula ong ba kano kano ka rai halor ka jinglah ban wan iasoh ki 9 na ki 12 ngut ki MLA ka UDP bad katto katne na ka MTC sha ka BJP kan dei ka ban shim da ki Nongialam na Delhi.
U bah Hek ula kynthoh ia kane halor ka khubor ba palat 9 ngut ki MLA ka UDP bad katto katne ki TMC kila pynkhreh ban leit iasoh noh sha ka BJP ha ki khyndiat sngi ban wan.
“Ka jingkhang jong ka BJP ka plie ia baroh ba kin wan iasoh. Ngi la phaikhmat sha ka Sorkar ban ialam da ka BJP ha Meghalaya ha u snem 2028” ong u Bah Hek.
Hynrei ula ban jur ba ka State Unit kam don satia ia kano kano ka bor ban shim rai halor ka jingwan iasoh.
“Ia kum kata ka jingkylli phi kylli ia nga, tangka BJP ha Delhi kaba lah ban shim ia ka rai halor kata. Ngi don u Chairmen, ba khmih ia ka NEDA jong ka party, kidei ma ki kiba leh ia kiei kiei baroh. Hynrei haba iadei bad ka jingkhot ia kino kino ki political party ne nongialam, ka rai ba khatduh ka wan naki nongialam na Delhi jong ka BJP” ong u Bah Hek.
Une u Nongialam ka BJP ula kular ba ki jingialang kila urlong, hynrei kane ka kam ka shong beit ha ka rai na Delhi.
“Hooid, kila don ki jingialang bala pynlong ha kine ki khyndiat sngi hynrei ia kane ka kam ba mynta, kan dei beit ka rai jong ki nongialam na Delhi. Baroh ki rai, baroh ki jingtreikam ki wan na ki nongialam na Delhi. Kane kam dei ka rai ka ban wan na ka State BJP” ula ong.
Halor ka jingiasngewthuh jingmut hapdeng ki paralok ba iatreilang ha ka MDA, u Bah Hek ula ong ba um don satia ia ka hok ban kynthoh halor kiwei pat ki seng sain pyrthei.
