Mawkyrwat, Nailar 31 : Ka Synjuk ki Rangbah Shnong ka Hima Nobosohphoh Syiemship, kala pynpaw ia ka jingpyrshah kaba jur halor ka jingthung biang ka Khasi Hills Autonomous District Council (KHADC) ba synshar da ka Voice of the People Party (VPP), ia u Bah Kawangbor Syiemiong kum u Syiem ba pura ka Hima.
Kane ka rai jong ka Synjuk kala mih na ka jingialang bala pynlong kyrkieh ha ka 29 tarik Nailar ha ka shnong Rangblang, South West Khasi Hills District.
Ka Synjuk kala pynpaw ba ki Khun ki Hajar ka Hima kim shaniah shuh ia u Bah Kawangbor namar ka jingkynnoh ba um ju shong thikna hapoh ka Ophis Syiem bad ba um ju ai jingshai ruh ia ka kam pisa pilain hapoh ka Dorbar Hima bad kham kongsan eh ka dei ka jingbym sngewtynnad ia u namar um dei u briew napoh ka Hima.
U Chairman ka Synjuk bah Bokstone Thongni haba kren sha ki lad pathai khubor hadien ka jingialang, ula iathuh ba ka Synjuk naduh ki por jong ka Executive Committee barim ba ialam ka NPP, kila ujor pyrshah ia u bah Kawangbor halor ki hynriew tylli ki mat bad kane ka Executive Committee kala sospon noh ia u bad thung da u Acting Syiem Bah Ferdinand Syiemiong.
“Kaba pynkyndit ia ki Khun ki Hajar ka Hima ka long ba ka EC ka VPP khlem da bishar bniah, kala thung biang ia u Bah Kawangbor Syiemiong kum u Syiem ba pura ka Hima Nobosohphoh” ula kynnoh.
Kumjuh ruh arngut ki Lyngdoh ka Hima kila pynpaw ia ka jingbym sngewtynnad shuh ban iatreilang bad u Bah Kawangbor namar ka jingkynnoh ba u leh ia ki kam donbor khamtam ha kaba weng jubor ia u General Secretary khlem ka jingtip ki Lyngdoh nalor ka jingweng ia u Lyngdoh ka Kur Paliar bad thung bujli da uwei pat.
Kine ki Lyngdoh ki pyntip ba ki kynhun ba pyrshah ia u Bah Kawangbor ki kynthup na ki Lai Lyngdoh, Thongni San Mat, ki Lai Kynja, ka Kur Paliar Markyrda bad ka Ing Sad Kur Syiemiong.
Ka Synjuk ha kane ka jingialang kala rai ruh ban phah biang da ka jingthoh sha ka KHADC ban dawa weng mardor ia u Bah Kawangbor Syiemiong na ka khet Syiem bad ban thung bujli noh da u Bah Ferdinand Syiemiong uba dei u trai Hima.
 ba synshar da ka Voice of the People Party (VPP), ia u Bah Kawangbor Syiemiong kum u Syiem ba pura ka Hima.){kind=link}