Shillong, Jylliew 28 : Ka JUD Cement Ltd kala pyntip sha Iingkashari Meghalaya High Court ba ka long kaba kloi ban siew noh T.1 klur hapoh ka artaiew ia ka bai bording bala pynsahteng, kaba kot haduh T.7.20 klur.
Kane ka kompani kala pynpaw ruh ia ka jingiakynduh ia ka jingeh ha ka kam pisa pilain.
Ia kane la pyntip ha ka 26 tarik Jylliew hakhmat u Justice HS Thangkhiew, ha ka por ba shong bishar ia ka WP(C) No. 277 of 2026 bala mudui daka JUD Cement Ltd pyrshah ia ka Meghalaya Power Distribution Corporation Ltd. Bad kiwei kiwei.
U Nongiasaid Ain K Paul ba mihkhmat ia ka nongmudui, ula pyntip sha ka Iingkashari ia ka jingtyrwa jong ka kompani ban siew T.1 klur na ka pisa ba pynsah kaba long T.7.20 klur.
U Nongiasaid Ain jong ki liang mamla ula pan por ban shim ia ki jingbthah halor kane ka jingtyrwa ban kyrpad ban bishar biang ia kane ka kam ha ka 29 tarik Jylliew, 2026.
Haba shah ia kane ka jingkyrpad, u Justice Thangkhiew ula bthah ba ban buh bishar biang ia kane ka mukotduma ha katei ka sngi.
