Shillong, Naitung 25 : U MP ka Shillong, Bah Vincent H Pala hynne ka sngi u la plie ia ka permanent campus jong ka Khrawsing Christian College kaba don ha Mawngap ha ka jingdonlang u MLA ka Mawphlang, Bah Eugene Lyngdoh kumjuh u MDC ka thaiñ ba dei ruh u Chairman ka KHADC, Bah Lamphrang Blah.
Katei ka jaka pule kaba pyniaid da ka Mawphlang Presbytery ka dei kaba ka Balang ka la seng kyrpang na ka bynta ki samla pule kiba dei na ki shnong sawdong ka thain kiba shem shitom ban ioh bteng ia ka jngpule jong ki ha Shillong.
U Bah Vincent haba kren ha ka jingialang u la ong ba dei ka jingiohi jngai jong ki nongialam Balang ba la mih kane ka college. U ong ruh ba ki don bun ki khynnah ba stad bad kiba suk ban ioh rung klas ha Shillong hynrei namar ba ki wan na ki iing ba duk kumta ki duh lad noh.
“Ki don bun ki khynnah watla ki stad hynrei ka jingduk ka khanglad ia ki ban bteng ia ki jingpule ha ki College ha Shillong. Hynrei dei lyngba kum kine ki college ba ki samla ki ioh ia ka jingkyrmen ban pyndep ia ka jingpule jong ki,” ong u Bah Vincent.
Utei u MP u la kular ruh ba nalor ba u la dep ban ai T.25 lak ia katei ka college ha ka por ba dang sdang mynta ruh un iakhun ban pynioh skhim biang khnang ba katei ka jaka pule kan ioh ban pyniar ha ka tnad pule Science kumjuh ha ka Commerce.
Na ka liang u Bah Eugene u la ong ba ha kane ka juk kaba baroh ki pyrkhat beit tang ialade shimet hynrei ka long pat ka jingkmen ban iohi ba katei ka College ka don ha katei ka jaka.
“Dei na kine ki jaka pule bad na kine ki kamra klas ba ju mih ki nongialam, kumta ngi dei ban kynmaw ba ki nonghikai ki dei kiba hakhmat eh ban burom namar ki dei ki nongsaiñdur ia ka lawei jong ngi,” u la ong.
Ha katei ka sngi la ioh ruh ia ka jingkren na u Bah R Rapthap ba dei u Secretary ka tnad Education ka sorkar jylla uba la batai bniah bha shaphang ka National Education Policy bad kiwei kiwei.
