Guwahati, Naitung 25 :Sa arngut ki nongtrei bylla na Assam ki ba la jah rngai na ka jaka pyntrei ia ka surok ha Kurung Kumey district ka Arunachal Pradesh naduh ka 5 tarik mynta u bnai la ioh ban pyllait im na ki bynta jong ka khlawbah hapoh ka district.
Ia kine ki nongbylla la ioh pyllait im hynne ka sngi Nyngkong na ka jaka khlaw ba rben hapdeng ka shnong Huri bad Tapa ka ba hapoh Kurung Kumey district hapdeng ka jingshitom ka ba jur, ong u Deputy Commissioner ka district u Bengia Nighee.
Ia kine ki arngut ki nongbylla la tip kyrteng kum u Kholebuddin Sheik, 27, bad u Shamidul Sheik, 19 snem rta la ioh ban pyllait im da ki dkhot jong ka tnat State Disaster Response Force (SDRF) ha ryngkat ka jingiarap lem jong ki trai shnong.
Shwa kane, ha ka sngi Saitjain ba la lah phra ngut na kine ki nongtrei ki ba jah rngai la ioh ban pyllait na ki jaka khlaw hapoh Arunachal Pradesh.
Baroh ki don haduh 19 ngut ki nongtrei bylla ki ba dei na ka thain shathie ka Assam ki ba pyntrei ia ka surok jong ka Border Roads Organisation (BRO) ki ba la jah rngai napoh Kurung Kumey district ka ba don hajan khappud ka India bad China naduh kine ki khyndiat taiew ba la lah.
Ia kine ki arngut la pynkynriah noh shapoh Primary Health Centre, ha ka ba lah ruh ban pynkynriah pat shapoh Tomo Riba Institute of Health and Medical Science (TRIHMS) ha Naharlagun, lane shapoh ka district hospital ha Koloriang, ong u Nighee.
