Shillong, Naiwieng 12 : U Myntri Rangbah Conrad K Sangma ha ka sngi Palei, ula aiti ia ki shithi thungkam sha ki 213 ngut ki nonghikai kiba dang shu thungkam thymmai, ki ban shakri ha ki college bapher bapher ka Sorkar ha Jylla.
Ia kane ka jingialang la pynlong ha State Convention Centre ha ka jingiadonlang u Myntri ka tnad Pule Puthi Bah Lahkmen Rymbui bad ki Heh Ophisar ka Tnad Pule Puthi.
Haba ai jingkren, u Myntri Rangbah ula ai khublei ia kine ki nonghikai kiba la shah jied kum u Assistant Professor bad Lecturer ki ban sa leit shakri ha ki college ka Sorkar kiba don ha kylleng ka Jylla. “Kane kam dei tang ka jingpyndep ia ki kam ba donkam ban leh da ki bor khmih hynrei ka khyllipmat ka ban saindur ia ka jingbha jong ka pule puthi ha ki kyrdan Higher Education hapoh ka Jylla na ka bynta ki snem ban wan” ula ong.
U Conrad ula ong ba ki nonghikai ki dei u budlum jong kino kino ki jaka pule bad ka jingpynkhlain ia ka jingdon ki nonghikai ka long kaba kongsan ha kaban pynjanai ia ka jingbha ia ka higher eduction ha kylleng ka Jylla.
Ha ka khubor ba ula ai sha kine ki 213 ngut ki nonghikai, u Myntri Rangbah ula ong ba ha ki kamra klas kaba kin sa leit rung, kin saindur ia ka pateng ban wan jong ki khun samla ka Meghalaya bad bynrap “Nga don ia ka jingsngewskhem kaba pura ba phin lah ban shimti ia kane ka jingkitkhlieh da ka jingaiti lut bad ka burom”. Ula kyntu ia ki nonghikai bad kin long kiba iai shah bad ban don ka mynsiem synei ia ki samla pule.
Ka jingthungkaam na ka bynta ka kam Assistant Professor bad Lecturer ha kylleng ki college ka Sorkar ka dei kaba la pynlong da ka Meghalaya Education Recruitment Board (MERB). Haduh 3,185 tylli ki aplikeshon la ioh ban pdiang bad na kine, 213 ngut ki kyrtong la jied t kum ki kyndon ka UGC, pynbud da ka personal interview bad kiwei kiwei.
Ki kam ba lait thylli yn sa pyndap noh ha Kiang Nangbah Government College, Jowai, Tura Government College; Sohra Government College; Williamnagar Government College; bad Capt. Williamson Sangma Memorial Government College, Baghmara.
La pyntip ruh ba yn sa pynsdang noh ia ka Science bad Commerce Stream ha Sohra Government College, Williamnagar Government College bad Capt. Williamson Sangma Memorial Government College, Baghmara nalor ka Arts & Commerce Stream ha College of Teacher Education, Rongkhon.
Kane ka jingthungkam nonghikai kan long ruh na ka bynta ki jaka pule ba thymmai ka ban kynthup ia ka P.A. Sangma Model Degree College, Rongjeng; Patharkhmah Model Degree College, Patharkhmah; College of Science and Commerce, Mawphlang bad College of Science and Commerce, Mahendraganj.
