Shillong, Naiwieng 12: Ka Joint Action Committee (JAC) Against the Shillong Ropeway Project ka la kyntait ia ka jingthmu jong ka sorkar ban ialam ia ki dkhot ka Committee sha Sikkim bad Shimla ban peit ia ki project Ropeway, da kaba ong ba ia u Lum Shyllong ym lah ban ianujor bad kiwei pat ki jaka rilum (Hills Station).
Haba kren shaki lad pathai khubor, ka President ka JAC Kong Deborah Marbaniang ka la ong ba ka Committee ka la kren shai ia ka nongrim jong ka hakhmat u Myntri ka tnat Tourism bah Paul Lyngdoh.
“Ngi la ong ia u Myntri ka tnat Tourism, ngim don jingkwah ban leit peit ia ki project ropeway sha Shimla ne shano shano ruh, namar ngi ha ka JAC ngim dei ki briew kiba beij ki ban shu ngeit ia kaei kaba u ong, ban leit kai shane shatai” ong ka Kong Deborah.
“Ym lah ban ianujor ia ka Shimla bad ka jylla Meghalaya, ka jylla Meghalaya ka pher bak-ly-bak na ka Shimla, namar ba u Lum Shyllong u dei uba ai bam, u ai um ia ka sor Shillong baroh kawei, u ai bording. Lada u Lum Shyllong u la jot, ka Shillong ka la kut noh”, ka la ong.
Halor ka jingkylli hato ka JAC ka kloi ne em ban leit lang bad ka sorkar na ka bynta ban leit jurip ia ka jaka ba thmu tei ropeway, ka Kong Deborah kala buh jingkylli, kan myntoi aiu ban leit jurip mynta.
“Ka myntoi aiu ban leit jurip, haba wat ka tyllong um kaba don sha lyndet jong ka jaka ba tei iaka ropeway, ka um ka ju tuid ha ka por lyiur bad ha ka por tlang hynrei naduh ba la pom ia ki dieng, mynta ka la tyrkhong”, ka la ong.
“Ka tyllong um, mynta ki kali kit um jong ki pulit pynlip ding bad ki kali kit um ki wan ban kit um kala tyrkhong. Kaei ka jingmyntoi ban leit jurip biang” ka la kylli.
