Shillong, Naitung 25: U Myntri ka Tnad rep ka Jylla Bah Banteidor Lyngdoh, hynne ka sngi nyngkong, u la plie ia u mawnongrim ban shna ia ka Iew ki Nongrep ba T.65 lak ne ka ‘Farmers Market’ ha ka shnong Jatah, kaba hap hapoh ka Mawkynrew Constituency.
Kane ka Iew ki nongrep ka dei kaba la bei tyngka da ka North Eastern Council (NEC) bad ka Meghalaya Basin Management Agency (MBMA) lyngba ka Meghalaya-Livelihood and Access to Market Project (M-LAMP) kaba long T. 50 lak bad T. 15 lak.
U Bah Banteidor uba dei ruh u MLA ka Mawkynrew, haba kren ha ka jingïalang, u la ban jur halor ka jingdonkam ban kyntiew ia ki nongrep lyngba ki ïew nongrep.
Haba pyntip ba u la dep ruh ban buh ia u mawnongrim jong ka ïew ki Nongrep ha Jongksha, u la ong, “Nga kwah ba kine ki ïew kin treikam bad ban long ka jingmyntoi ia ki nongrep ym ba kin long ïing jah”.
U la ong ba kine ki ar tylli ki ïew ki don ha ki jaka ba long pdeng bad kiba ki paidbah kin suk ka leit ka wan kumjuh ban pynpoi ia ki mar rep.
Ia kane ka jingialang la pyniaid da ka Jatah Integrated Village Cooperative Society ha ka shnong Jatah Nonglyer bad kiba la iadonlang ki kynthup ia u Bah D Hynñiewta, ADC East Khasi Hills, u Bah AS Suting, DPM M-LAMP, u Bah M Marbaniang, ki dkhot ka Society, ki nongïalam shnong, ki riewrangbah, ki nongshong shnong, ki khynnah skul nalor kiwei pat.
