Pynliem 1-0 kol ia ka Rangdajied FC
Shillong, Naitung 25: Ka Mawlai Sports Club ka la pyndep ia ka kylla ba nyngkong jong ha ka lympung Shillong Premier League ha ka rukom kaba ihun khamtam hadien ba ka ioh ban pynliem da 1-0kol ia ka Rangdajied United FC ha ka jingiakhun kaba long ha ka janmiet sngi Nyngkong ha Madan Third Ground Polo.
Ia katei ka kol kaba kongsan tam jong ka kynhun la ioh ban thep da u Donlad Diengdoh ha ka minit kaba 22 jong ka kylla step kaba pyntikna ruh ba katei ka kynhun kaba don ha khlieh duh jong ka miej ia khein point kan bteng ban lamkhmat da ki hynriew tylli ki jingjop,kawei ka jingiakhaid bad khlem pat shah thep wat tang shi kol ruh.
Kumba long mynta ka Mawlai ka don ha ka kyrdan kaba nyngkong da ki 19 point bud pat sa ka Langsning ha ka kyrdan kaba ar da 11 point. Hynrei na bynta ka Rangdajied pat, katei ka jingshah rem kadei kaba lai na bynta jong kiba bad mynta ki don ha ka kyrdan kaba lai da ki 11 point.
Ka jingiakhun pat la shai ka sngi kan long hapdeng ka Nangkiew Irat kaba don ha ka kyrdan kaba san pyrshah ia ka Ryntih kaba don ha ka kyrdan kaba saw.