Shillong, Naitung 25: U National Vice President ka National Peoples Party (NPP) bad Symbud Myntri Rangbah ka Jylla Bah Prestone Tynsong ula ther kylla ia u MDC ka BJP na Tura Bernard N Marak, ba u pynkylla kam politics ia ka jingshah khynra ka farmhouse ha ki Pulit, kiba la kam ba ka dei ka ktem awria.
“U Bernard N Marak ula pyrshang ban pynkylla kam politics ia kane ka jingjia” ong u Bah Prestone haba pynpaw “Ki paidbah ruh ki sngewthuh baka ain ka don..la ki dei ki riewsain pyrthei ne mano mano ruh…ka ain te ka ain hi”.
Haba iakren bad ki nongthoh khubor, une u Nongialam ka NPP ula ong baka Sorkar Jylla hi kan ym tuklar eiei ruh em ha ba iadei bad ka kam jong ki Pulit bad kan ailad beit ia ka ain ba kan iaid hala ka jong ka lynti.
“Ngi na ka Sorkar hi ngi khlem tuklar eiei ruh em. Kam mut satia ba tang namar ba u dei uban iakhun pyrshah ia u Myntri Rangbah ka Jylla (Elekshon 2023) ba ngi tieng ia u..Kane ka rukom pyrkhat ka dei kaba bakla” ula ong.
Kat kum ka jingong jong u, ha ka jingkhynra jong ki Pulit, ngi la lap ia bun bah ki bitor beer bad bun kiei kiei ruh haba buh jingkylli “Kumno phi lah ban ong ba kam don eiei satia”.
Haba kylli, u Bah Prestone ula ong ba lada une u MDC ka BJP u ngeit ba ka dei ka buit bala iasuhbuit lypa da ka Sorkar ban pynjah burom ia ka kyrteng jong u, balei ba um shym la ujor ejehar.
U Symbud Myntri Rangbah ula ong ba ka Sorkar Jylla kala bthah ia ka Tnad Pulit ban leh ia kaei kaba donkam bad ban iaid ruh kat kum ka lynti jong ka ain.
U Bah Prestone ula ong ruh ba ka jingkylli halor ka jingpynslem ia ka jingkhynra kam mih satia namar ki Pulit kila hiar ban khynra hadien ba kila ioh lum ia ki sakhi satar kiba khlain bad ki jingtip bala lum jan man ka sngi ia kiei ki kam kiba jia ha katei ka farmhouse.
